يراندا كوروناۆيرۋستىڭ ەكىنشى تولقىنى باستالۋى مۇمكىن

ساۋدا نۇكتەلەرىنىڭ يەلەرى كارانتيننىڭ جەڭىلدەتىلۋى جايلى جاڭالىقتى قۋانىشپەن قارسى الدى. الايدا قۇقىق قورعاۋشىلار بۇل ورىنداردى اشۋعا ءالى ەرتە دەيدى. يران وتكەن ايدا عانا كوروناۆيرۋس جۇقتىرعاندار سانى بويىنشا الدا تۇرعان 3 ەلدىڭ ءبىرى بولاتىن. قازىر يسلام رەسپۋبليكاسى بۇل تىزىمدە جوق. ەلدە ىندەتكە شالدىققاندار سانى تومەندەدى. ال ءبىر تاۋلىكتە قايتىس بولعاندار سانى جۇزدەن اسپايدى. ەندى مەملەكەت بىرتىندەپ قالىپتى ومىرگە قايتا ورالا باستادى. قالا ارالىق قاتىناس اشىلدى. جولداردا كولىك قوزعالىسى جانداندى. بارلىق كومپانيالار ۆيرۋستى جۇقتىرۋ مۇمكىندىگى بويىنشا تومەنگى، ورتا جانە جوعارى ساناتقا ءبولىنىپ، تەكسەرۋدەن وتكەن كاسىپورىندار ءوز جۇمىسىنا كىرىستى. ساۋدا نۇكتەلەرى كەزەڭ- كەزەڭمەن جانە كەلىسىلگەن كەستە بويىنشا اشىلىپ جاتىر. تاياۋدا ءدامحانا مەن مەيرامحانالار دا ءوز جۇمىسىن باستادى.

موحامماد ناگحاۆيان، ءدامحانا يەسى:

- بۇل ەڭ كۇردەلى داعدارىس بولىپ وتىر. كەلۋشىلەر جوق. الايدا ورىندى جالداۋ اقىسىن، قىزمەتكەرلەردىڭ جالاقىسى مەن كوممۋنالدىق تولەمدەردى تولەۋگە مىندەتتىمىز. امال قانشا، بارىنە توزۋگە تۋرا كەلەدى. ءبىر اي ما، جارتى جىل ما، قانشا كەرەك دەسە، سونشا ۋاقىت مۇنىڭ ءبارىن ءوز قالتامنان تولەۋگە دايىنمىن. ەڭ باستىسى، ۆيرۋستىڭ تارالۋى توقتاسا ەكەن. سوندا وتباسىم كوشەدە ەمىن- ەركىن جۇرە الادى.

شەكتەۋ شارالارىنىڭ جارتىلاي جەڭىلدەتىلگەنى دەنساۋلىق ساقتاۋ سالاسى ماماندارىن الاڭداتىپ وتىر. ماماندار جەرگىلىكتى جۇرت ەپيدەميانىڭ ەكىنشى تولقىنىنىڭ قاۋپىن جەتە سەزىنبەي ءجۇر دەگەندى العا تارتادى. ياعني تۇرعىندار ارقانى كەڭگە سالماي، بارىنشا بۇرىنعىداي سانيتارلىق ەرەجەلەردى ساقتاۋى ءتيىس.

حاميد زاۆار، مەيرامحانا ديرەكتورى:

- قازىر بيلىك پەن حالىق بىرگە بولۋ كەرەك. ەڭ باستىسى، ۆيرۋستى جەڭىپ شىعۋىمىز قاجەت. وسىدان كەيىن ۇكىمەت، مەدجيليس پەن وزگە مەملەكەتتىك ورگاندار بار كۇش- جىگەرىن قاراپايىم حالىقتىڭ قارجىلاي قيىندىقتارىن شەشۋگە جۇمساعانى ءجون.

بيلىك سونداي- اق سپورتتىق شارالاردى قايتا باستاۋ ماسەلەسىن تالقىعا سالدى. ازىرشە جارىستار 4 - مامىرعا دەيىن شەگەرىلگەن. ەندى 4 - مامىردا پارلامەنت وسى ماسەلەگە قاتىستى ناقتى شەشىم قابىلداۋى ءتيىس.