مەككە جانە مەدينا رامازان ايىندا دا بوس تۇر
نۇر-سۇلتان. قازاقپارات - ون ەكى ايدىڭ سۇلتانى - قاسيەتتى رامازان ايىنىڭ بۇگىن ەكىنشى كۇنى، دەپ حابارلايدى «حابار 24».
ورازا پاندەميا جاعدايىندا ءوتىپ جاتقاندىقتان، بيىل مەككە جانە مەدينا قالالارىندا كىسى قاراسى از. ءتىپتى اركىم ءوز ۇيىندە دەسە دە بولادى. قالاداعى ەڭ ۇلكەن مەشىتتەردە بەس ۋاقىت جانە تاراۋيح نامازىن وقۋ ۋاقىتشا توقتاپ تۇر. سەبەبى سونداي ءپاتۋا قابىلداندى. ساۋد ارابيا بيلىگى ەلدىڭ ءبىر ورىندا كوپتەپ جينالۋى، ۆيرۋستىڭ جاپپاي تاراۋىنا سەبەپ بولۋى مۇمكىن دەپ توپشىلايدى.
ايتا كەتەيىك، بۇل شاھارلار 20 - ناۋرىز كۇنى كوروناۆيرۋستىڭ دەندەۋىنە بايلانىستى جابىلعان ەدى. سودان بەرى قاجىلىققا كەلۋگە رۇقسات جوق. جەرگىلىكتى بيلىك جاماعاتقا تاراۋيح نامازدى ۇيدە وقۋعا كەڭەس بەرەدى. مەشىتتە تەك ازان شاقىرۋعا رۇقسات ەتىلگەن.
ابدۋل راحمان ال- سۋدايس، ال- حارام مەشىتىنىڭ يمامى:
- بيىلعى رامازان ەرەكشە جاعدايدا ءوتىپ جاتىر. قازىر بۇكىل الەم كوروناۆيرۋس پاندەمياسىمەن كۇرەسۋدە. سوندىقتان ءتيىستى شارالاردىڭ قابىلدانۋى وتە ورىندى. بۇل ايدا بارلىق مۇسىلمان قاۋىمى اللادان ىندەتتەن امان- ەسەن شىعۋدى تىلەسە دەيمىز.
