ءانشى ەرنار ايدار كارانتين رەجىمىن بۇزعانى ءۇشىن جازالاندى
الماتى. قازاقپارات - ءانشى ەرنار ايدار كارانتين رەجىمى بۇزعانى ءۇشىن اكىمشىلىك جاۋاپكەرشىلىككە تارتىلدى، دەپ حابارلايدى قازاقپارات ءتىلشىسى.
قالالىق پوليتسيا دەپارتامەنتىنىڭ باسپا ءسوز قىزمەتىنىڭ حابارلاۋىنشا، 12 ادام ءبىر عيماراتقا جينالىپ ۇتىس ويىنىن ۇيىمداستىرعان.
«ولاردىڭ اراسىندا ءانشى ەرنار ايدار بار. جينالعاندار ونلاين ترانسلياتسيا جۇرگىزگەن. ولاردى ەكونوميكالىق تەرگەۋ دەپارتامەنتى ۇستاعان. پوليتسيا جينالعاندارعا قاتىستى ق ر ا ق ب ك 476-بابىمەن اكىمشىلىك حاتتاما تولتىردى. ءىس ماتەريالدارى قازىر اۋدانارالىق اكىمشىلىك سوتقا جىبەرىلدى» ، - دەدى مەدەۋ اۋداندىق پوليتسيا باسقارماسى باسشىسى بولات توتىبايەۆ.
توتەنشە جاعداي رەجىمىن بۇزعاندارعا ق ر ا ق ب ك 476-بابى بويىنشا 10 ا ە ك مولشەرىندە ايىپپۇل جانە 15 تاۋلىككە دەيىن قاماۋ جازاسى قاراستىرىلعان. ايتا كەتۋ كەرەك، قازىر الماتىنىڭ پوليتسەيلەرى الەۋمەتتىك جەلىگە مونيتورينگ جۇرگىزىپ جاتىر. كەشە ۆاينەرلەردىڭ ءبىرى - جەلىدە «Zheka_Fatbelly» لاقاپ اتىمەن تانىمال جەڭىس وماروۆ ۇستالدى.
وعان سوت شەشىمىمەن 10 اەك مولشەرىندە ايىپپۇل سالىندى. ول دوسىن ۇيىنە شاقىرىپ، شاشىن الدىرعان. سول بەينەروليكتى ينتەرنەتكە جۇكتەگەن. ەسكە سالا كەتسەك، مۇنىڭ الدىندا بەلگىلى ءانشى ارمان قوڭىربايەۆ تا كارانتين رەجىمىن بۇزعانى ءۇشىن جاۋاپكەرشىلىككە تارتىلعان بولاتىن. ءانشى الماتىداعى مەيرامحانالاردىڭ بىرىنە بارعان.
