ە. مارجىقپايەۆ باسشىلارعا قىزمەتكەرلەرىنىڭ جەمقورلىعى ءۇشىن جاۋاپقا تارتىلاتىنىن ەسكەرتتى

ايماق باسشىسى اتاپ وتكەندەي، مەملەكەت باسشىسى سىبايلاس جەمقورلىققا قارسى كۇرەستە ناقتى باسىمدىقتار قويدى. زاڭنىڭ قابىلدانۋىمەن ەلىمىزدە سىبايلاس جەمقورلىققا قارسى ءىس- قيمىلدىڭ جاڭا كەزەڭى باستالادى. العاش رەت باسشىلاردىڭ باعىنىشتىلارعا جاۋاپكەرشىلىگى زاڭنامالىق دەڭگەيدە بەكىتىلگەن.

بۇل نورما قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ تىكەلەي تاپسىرماسى بويىنشا زاڭعا ەنگىزىلگەن.

«تۇڭعىش رەت باسشىلاردىڭ باعىنىشتى قىزمەتكەرلەرى ءۇشىن جاۋاپكەرشىلىگى زاڭنامالىق دەڭگەيدە بەكىتىلگەن. بۇدان بىلاي، ساياسي مەملەكەتتىك قىزمەتشىلەر ولاردىڭ تىكەلەي قاراماعىنداعى قىزمەتكەرلەرى سىبايلاس جەمقورلىق قۇقىق بۇزۋشىلىق جاساسا مىندەتتى تۇردە وتستاۆكاعا شىعۋعا سۇرانۋى كەرەك. ءبىرىنشى باسشى ونىڭ تىكەلەي باعىنىشتى تۇلعاسىنا قاتىستى سوتتىڭ ايىپتاۋ ۇكىمى كۇشىنە ەنگەننەن سوڭ كۇنتىزبەلىك 10 كۇن ىشىندە نەمەسە اقتالمايتىن نەگىزدەر بويىنشا قىلمىستىق ءىس توقتاتىلعاننان كەيىن وتستاۆكاعا كەتۋگە مىندەتتى. ال ساياسي ەمەس، ءبىراق ا جانە ب كورپۋسىنىڭ اكىمشىلىك مەملەكەتتىك قىزمەتشىلەرى بولىپ تابىلاتىن بارلىق باسقا باسشىلارعا تارتىپتىك جاۋاپكەرشىلىك قاراستىرىلعان»، - دەپ اتاپ ءوتتى ە. مارجىقپايەۆ.

كەڭەس سوڭىندا وبلىس اكىمى مەملەكەتتىك ورگانداردىڭ بارلىق باسشىلارىنا، اسىرەسە توتەنشە جاعداي رەجيمىندە ولاردىڭ جەكە جاۋاپكەرشىلىگى تۋرالى ەسكەرتتى.

ايتا كەتۋ كەرەك، بيۋدجەت قاراجاتىن ماقساتتى جۇمساۋعا، ەڭبەك ۇجىمدارىنداعى سىبايلاس جەمقورلىقتى جويۋعا، سونداي-اق پاراساتتىلىق قاعيداتتارىن ەنگىزۋگە ەرەكشە نازار اۋدارىلدى.

اۆتور: اسلان وسپانوۆ