كۇندە جەپ جۇرگەن زياندى تاعامدار

كوپشىلىك ءىشىپ جۇرگەننەن كەيىن ءبىز دە ونىڭ زيانىنا قاراماي جۇرە بەرەمىز. ونىڭ كەيبىرى دەنساۋلىققا زيان كەلتىرسە، ەندى ءبىرى سۇلۋلىق پەن كەلبەتكە، پسيحولوگيالىق كوڭىل-كۇيگە كەرى اسەر ەتەدى.

سالماق قوسىپ، بەتكە ءاجىم تۇسىرەتىن، بەزەۋ شىعاراتىن دا وسى تاعامدار.

قانت

ەڭ زياندى قوسپالاردىڭ ءبىرى ءارى نەگىزگىسى - قانت. مۇنى ءبارى بىلەتىن بولار. قانتتىڭ زيان ەكەنى بۇرىننان ايتىلىپ جاتىر.

قانتتى كوپ جەۋگە بولمايدى. قانتتى كوپ جەيتىن ادامداردىڭ بەتىنە اقتاڭداپ ءتۇسىپ، بەزەۋ قاپتايدى، تسەلليۋليت پەن ءاجىم پايدا بولادى. تولۋدىڭ دا سەبەبى - قانت.

قانت كوپ جەيتىن بالالاردىڭ ءوسۋ گورمونى ازايىپ، دەنە-ءبىتىمىنىڭ دۇرىس قالىپتاسۋىنا زيان كەلتىرەدى. اعزاسىندا قىشقىل كوبەيىپ، يممۋنيتەتى تومەندەپ كەتەدى. قانتتىڭ ورنىنا تابيعي تاتتىلەردى جەگەن ءجون. ماسەلەن، بال، جەمىس-جيدەك (قۇرما)، شىرىننىڭ پايداسى الدەقايدا جاقسى.

اسىرەسە، بالالارعا تۇت اعاشىنىڭ جەمىسىن بەرگەن دۇرىس. ءتاتتى كامپيتتى الماستىرا الاتىن جەمىس.

ىشىمدىك

ىشىمدىك زيان. ىشىمدىكتىڭ اعزاعا زياننان باسقا ەش پايداسى جوق كالوريا ەكەنىن ۇمىتپايىق. بوس كالوريانى قورىتامىن دەپ اسقازان مەن اعزا بوسقا شارشايدى. ىشىمدىك ىشكەن ادامنىڭ گورموندارى وزگەرىپ، باۋىر جۇمىسى ناشارلايدى. قان اينالىمى دا سونىڭ كەسىرىنەن بۇزىلادى.

كونسەرۆ ونىمدەرى

كونسەرۆىگە سالىنعان ازىق-تۇلىكتىڭ زيان ەكەنىن ءبىرى بىلسە، ءبىرى بىلمەيدى. قالبىرعا سالىنعان تاعام ءاۋ باستا تابيعي قاسيەتى جوعارى ازىق بولعانىمەن، ونى «تەمىر قاپشىققا» سالعاننان كەيىن بۇل قاسيەتىنەن تۇك تە قالمايدى. ويتكەنى وعان وندىرۋشىلەر ۇزاق ۋاقىت ساقتالسىن دەپ حيميالىق قوسپالار ارالاستىرادى.

ال ول ادام گورمونىنا زيان كەلتىرەدى، ازايتىپ جىبەرەدى.

مايلى تاعام

از قۋىرىلعان تاعامنىڭ پايداسى كوبىرەك. تاعامدى كوپ قۋىرعان سايىن سوعۇرلىم پايدالى قاسيەتتەرىنەن ايىرىلادى. سودان تاعامدا اۋىر ەلەمەنتتەر كوبەيىپ كەتەدى دە، ادام اعزاسىنا تۇسكەننەن كەيىن قورىتىلمايدى، دەنەنى دەپرەسسياعا تۇسىرەدى، شارشاتادى.

قۋىرىلعان كوكونىستىڭ ءوزى پايداسىنان ايىرىلادى.

گازدالعان سۋسىن

ءبىر بوتەلكە گازدالعان سۋسىننىڭ قۇرامىندا 10 قاسىق قانت بولادى. ال قانتتىڭ قانداي زيان ەكەنىن جوعارىدا جازدىق. ودان بولەك، مۇنداي سۋسىنداردىڭ قۇرامىندا فوسفات كوپ بولادى، ول ادامنىڭ تەز قارتايۋىنا اكەلەدى.

ديەتالىق سۋسىن دەگەن جارناماعا سەنبەڭىز. تابيعي سۋسىننان باسقا ەشقانداي سۇيىقتىق مەتابوليزمدى (زات الماسۋ) كۇشەيتە المايدى.

ءسۇت تاعامدارى

ءسۇتتىڭ اعزاعا پايداسى كوپ، ارينە. ءبىراق دۇكەن سورەسىندە تۇرعان ءسۇت ونىمدەرىنە سەنىم جوق. وندىرۋشىلەر ءسۇت، ىرىمشىك، قايماق ۇزاق ۋاقىت ساقتالسىن دەپ قۇرامىنا انتيبيوتيكتەر مەن گورموندار قوسادى.

سودان ادام اعزاسىندا ينسۋلين كوبەيىپ كەتەدى. بۇل اۋرۋدىڭ قابىنۋىنا اكەلەدى. سوندىقتان تابيعي ءسۇتتى ىشۋگە تىرىسقان ابزال.

Massaget.kz