قازاقستاندا باسپانا باعاسى ارزانداي ما - ساراپشى پىكىرى
نۇر- سۇلتان. قازاقپارات - تاياۋ ۋاقىتتا تۇرعىن ءۇي نارىعىندا قانداي جايت ورىن الۋى مۇمكىن؟ باسپانا باعاسى ءتۇسۋى مۇمكىن بە؟
ءدال وسى ماسەلەلەرگە قاتىستى قازاقستان ريەلتورلارى بىرلەسكەن قاۋىمداستىعى پرەزيدەنتىنىڭ كەڭەسشىسى نينا لۋكيانەنكو پىكىر ءبىلدىردى، دەپ حابارلايدى قازاقپارات ءتىلشىسى.
«كارانتين جاعدايىندا جىلجىمايتىن مۇلىككە سۇرانىس كەيىنگە قالىپ جاتىر. وكىنىشكە قاراي، ساتۋشىلاردىڭ باسىم بولىگى وقشاۋلانۋ كەزەڭىندە جانە قالادا ءجۇرىپ- تۇرۋعا ەنگىزىلگەن شەكتەۋگە بايلانىستى ساتۋ جارنامالارىن الىپ تاستادى. بۇل ءبىر جاعىنان نىسانداردى كورسەتۋ مۇمكىندىگىنىڭ جوقتىعىنا جانە قاۋىپكە دە بايلانىستى» ، - دەيدى ول. سونىمەن قاتار ساراپشى جىلجىمايتىن مۇلىككە باعانىڭ تومەندەۋ مۇمكىندىگىنە دە قاتىستى پىكىرىمەن ءبولىستى.
«ەكونوميكاداعى قازىرگى احۋال بارلىق بيزنەستىڭ تابىسىنا قاتتى اسەر ەتەتىنى تۇسىنىكتى بولىپ تۇر. دەمەك، جەكەلەي العاندا ءاربىر وتباسىنىڭ كىرىسىنە جانە ەكونوميكالىق جاعدايىنا اسەر ەتەدى دەگەن ءسوز. تاۋارلار مەن قىزمەتتەردىڭ باعاسى سۇرانىس تولەم قابىلەتىنىڭ ىقپالىمەن جانە نارىقتاعى ۇسىنىستارمەن قالىپتاسادى. ال تولەم قابىلەتى قاتتى زارداپ شەكتى جانە تاياۋ ارادا وڭالا قويمايدى. تاياۋ ۋاقىتتا ەكونوميكانىڭ بەلسەندىلىگى جاندانىپ، كاسىپورىندار، شاعىن جانە ورتا بيزنەس جۇمىسىن باستاعانعا دەيىن 2-3 اي وتەدى. سودان كەيىن بارىپ نىساندارعا ارنالعان مامىلەنىڭ باعاسى ءبىرشاما ايقىندالىپ قالادى. قازىرگى كەزەڭدە تاراپتاردىڭ ءارقايسىسى ءوز قاجەتتىلىگىنە قاراي ويلايدى. ساتۋشىلار دوللاردىڭ باعاسى كوتەرىلگەنىنە ارقا سۇيەپ، باعانى تىم جوعارى كوتەرىپ جىبەرسە، ساتىپ الۋشىلاردىڭ باسىم بولىگى دوللار باعامىنىڭ كوتەرىلگەنىن كەلتىرىپ، باعانى نەگىزسىز تومەندەتەدى. مەنىڭ بولجامىمشا، جىلدىڭ سوڭىنا دەيىن باعا تومەندەۋى 7-10 پايىزعا جەتىپ قالادى» ، - دەيدى نينا لۋكيانەنكو. ساراپشى نارىقتا تۇرعىن ءۇي شامادان تىس كوپ دەگەن پىكىرگە قاتىستى ويىن ءبىلدىردى.
«مەن ولاي ويلامايمىن. پاتەرگە سۇرانىس بولدى، بولادى جانە بولا بەرمەك. ادامدار دۇنيەگە كەلەدى، ومىردەن وزادى، قونىس اۋدارادى، كوشىپ كەتەدى، باس قوسادى جانە اجىراسادى. تۇرعىن ءۇي اينالىمى بارلىق ۋاقىتتا بولادى. بۇعان قوسا، جىلجىمايتىن مۇلىك نىساندارى ءوز اكتيۆىڭدى ساقتاۋدىڭ جانە كوبەيتۋدىڭ باستى تاسىلدەرىنىڭ ءبىر بولىپ قالا بەرەتىنىن دە ەستەن شىعارماۋ كەرەك» ، - دەدى ول.
