تۇرلەرىڭىز قازاق، تىلدەرىڭىز باسقا: بەكبولات تىلەۋحان دەپۋتاتتارعا ۇرسىپ تاستادى

سىزدەر دۇرىس تۇسىنىڭىزدەر، دەپۋتاتتىق ەتيكاعا ساي ەمەس ءسوز ايتقالى تۇرمىن. مەن سىزدەردى تۇزەپ كۇستانالاپ جاتقان دا جوقپىن. ايتقىم كەلگەنى، وسىمەن ەكىنشى وتىرىس قاتارىنان مەملەكەتتىك ءتىل دەپۋتاتتىق ساۋال بەرۋ ستاتۋسىنان ايىرىلعان سەكىلدى. وتكەندە 6-7 ساۋال بولدى، بىرەۋى دە قازاقشا ايتقان جوق. ال بۇگىن التى ساۋالدىڭ بەسەۋى مەملەكەتتىك ءتىلدى قاجەتسىنبەدى. ەلباسىنىڭ «قازاق قازاقپەن قازاقشا سويلەسسىن» دەگەن ءسوزى بار. ەڭ بولماسا، قازاق دەپۋتاتتار سىزدەر مەملەكەتتىك تىلدە ساۋال جولداساڭىزدار بولار ەدى عوي؟، - دەدى بەكبولات تىلەۋحان.

ول دەپۋتاتتىق ساۋال - تابان استىندا يمپروۆيزاتسيامەن شىعاتىن دۇنيە نەمەسە ديالوگ ەمەس. سوندىقتان دايىندالىپ كەلۋگە بولاتىنىن ايتتى.

ۇلكەن زەرتتەۋ مەن تەرەڭ زەرتتەۋدەن كەيىن ءسوز الىنادى ەمەس پە؟ كومەكشىلەر، اۋدارما ءبولىمى بار. سىرتتان تەلەديدار ارقىلى قاراپ وتىرعاندارعا بۇل جينالىس نۇر-سۇلتاندا ەمەس، باسقا جەردە بولىپ جاتقان سەكىلدى كورىنۋى مۇمكىن. تۇرلەرىڭىز قازاق، ءبىراق اۋىزدارىڭىزدان مەملەكەتتىك تىلدە ءسوز شىعىپ جاتقان جوق. قازاق ءتىلىنىڭ قازاقستاننان باسقا بارار جەر، باسار تاۋى جوق. ەندى ول پارلامەنت قابىرعاسىندا جەتىمنىڭ كۇيىن كەشسە، نە بولادى؟ نۇرلان زايروللا ۇلى (ءماجىلىس ءتوراعاسى نىعماتۋلين - ءتىلشى) ارىپتەسىمىز ميكاەلياننىڭ ساۋالىنا قازاقشا جاۋاپ بەرمەگەن شەنەۋنىكتى قالاي ورنىنا قويدىڭىز، حالىق سوعان قاتتى ريزا بولدى. باياعىدا بىرەۋ، «قارنىمنىڭ اشقانىنا ەمەس، قادىرىمنىڭ قاشقانىنا ناليمىن» دەپتى عوي. ارىپتەستەر دۇرىس تۇسىنىڭىزدەر، - دەدى دەپۋتات.

ال ءوز كەزەگىندە ءماجىلىس ءتوراعاسى نۇرلان نىعماتۋلين ارىپتەسىن قولداپ، «دۇرىس ايتاتىن جەردە ايتۋ كەرەك» دەدى.

BAQ. KZ