مونشادا كوڭىل كوتەرگەن جەمقورلىقپەن كۇرەس قىزمەتكەرلەرىنە سوت ايىپپۇل سالدى
«2020-جىلعى ءساۋىردىڭ 21 دە كوكشەتاۋ قالالىق مامانداندىرىلعان اكىمشىلىك سوتى توتەنشە جاعداي رەجيمىن بۇزعان جەمقورلىققا قارسى كۇرەس قىزمەتىنىڭ ءۇش قىزمەتكەرىنە ماكسيمالدى جازا تاعايىندادى. ق ر ا ق ب ك 32- بابى سوتقا قۇقىق قورعاۋ ورگاندارىنىڭ قىزمەتكەرلەرىنە قاماۋ جازاسىن تاعايىنداۋعا رۇقسات ەتپەيدى. اتالمىش قۇقىق بۇزۋشىلىقتى جاساۋ كەزىندە ونىڭ قاتىسۋشىلارى قۇقىق قورعاۋ جۇيەسىنىڭ قىزمەتكەرلەرى بولدى. سوندىقتان، سوت ر. تۇرعامبەكوۆ، ج. اقمولدين، ا. قاعارمانعا 10 ايلىق ەسەپتىك كورسەتكىش كولەمىندە ايىپپۇل تۇرىندە ماكسيمالدى جازا تاعايىندادى»، - دەدى اقمولا وبلىستىق سوتىنىڭ باسپا ءسوز حاتشىسى كۇلاش دومالاقوۆا.
سونىمەن قاتار، ول قالعان ەكەۋىنىڭ ءىسى ەرتەڭ قارالاتىنىن اتاپ ءوتتى.
ايتا كەتەيىك، وسىعان دەيىن حابارلاعانىمىزداي، اقمولا وبلىسى بويىنشا سىبايلاس جەمقورلىققا قارسى ءىس-قيمىل دەپارتامەنتىنىڭ لاۋازىمدى تۇلعالارى توتەنشە جاعداي كەزىندە كوكشەتاۋداعى مونشا كەشەنىندە كوڭىل كوتەرىپ جاتقان جەرىندە ۇستالعان ەدى.
كەيىن ق ر سىبايلاس جەمقورلىققا قارسى ءىس-قيمىل اگەنتتىگى اقمولا وبلىستىق دەپارتامەنتىنىڭ تەرگەۋ باسقارماسى قىزمەتكەرلەرىنىڭ توتەنشە جاعداي رەجيمىن بۇزۋ فاكتىسى بويىنشا قىزمەتتىك تەكسەرۋ جۇرگىزدى. ناتيجەسىندە 20- ساۋىردە اگەنتتىكتىڭ ورتالىق اپپاراتىنىڭ تارتىپتىك كوميسسياسىنىڭ شەشىمىمەن وسى وقيعاعا قاتىسى بار جەمقورلىقپەن كۇرەس قىزمەتكەرلەرىنىڭ بارلىعى قىزمەتىنەن قۋىلدى.
ال، وبلىستىق دەپارتامەنت باسشىسى م. تولەۋبايەۆ جەكە قۇراممەن الدىن الۋ جۇمىسىن ناشار ۇيىمداستىرعانى ءۇشىن قىزمەتىنە تولىق سايكەس ەمەستىگى تۇرىندە جاۋاپقا تارتىلدى.
