قارا التىن نارىعىنداعى «قارالى كۇن» بولدى

«دابليۋ تي اي» ماركالى مۇناي تاريحتا العاش رەت مينۋسقا كەتىپ، ءبىر باررەلى مينۋس 40 دوللاردان ساۋدالاندى.

قازىر شامامەن 160 ميلليون باررەل مۇناي تانكەرلەردە ساقتاۋلى. بۇل - بۇرىن- سوڭدى بولماعان جاعداي. وعان - جاھاندى جايلاعان كوروناۆيرۋس سەبەپ. ويتكەنى وسى ءبىر ىندەتتىڭ كەسىرىنەن بۇكىل الەمدە ءوندىرىس ورىندارى، اۋە جانە اۆتوكولىك قوزعالىسى تۇرالاپ قالدى. ءسويتىپ، سونىڭ سالدارى دۇيسەنبى كۇنى مۇناي نارىعىنا سوققى بولىپ ءتيدى.

قارا التىن باعاسى كۇرت قۇلدىراپ، شيكىزات ءبىر باررەلىنە مينۋس 38 دوللاردان ساۋدالاندى. مامانداردىڭ ايتۋىنشا، بۇل - كۇتپەگەن جاعداي ەمەس، سوندىقتان الاڭداۋعا نەگىز جوق.

ەندريۋ لەبوۋ، ساراپشى:

- مۇنايدىڭ مامىر ايىنداعى فيۋچەرستەرىندە بايقالعان تەرىس ءۇردىس جايلى بىرنەشە اپتا بويى ايتىلىپ كەلدى. كوز جەتكەن ءبىر نارسە: شيكىزات باعاسى باررەلىنە مينۋس 50 ءتىپتى 60 دوللار بولسا دا، وكلاحوماداعى مۇناي قويمالارىنان ورىن تابىلا قويۋى ەكىتالاي. سەبەبى ءبارى لىق تولعان. مۇنداي جاعداي ەكونوميكاعا كەرى اسەر ەتەتىنى بەلگىلى، ارينە. ءبىراق قالاي بولعاندا دا، بۇل تەك مامىر ايىنداعى فيۋچەرستىك كەلىسىمشارت قانا. ماسەلەن، ماۋسىمدىق فيۋچەرستەردە قازىر ءبىر باررەلدىڭ باعاسى 20 دوللار توڭىرەگىندە تۇر.

ولاردىڭ ارزانداپ كەتۋى مۇمكىن بە؟ جاقىن ۋاقىتتا قويمالاردان بوس ورىن تابىلمايتىنىن ەسكەرسەك، ماۋسىمدا دا قارا التىن باعاسىنىڭ السىرەۋى ابدەن ىقتيمال. باعانىڭ قۇلدىراۋى مۇنايدى جەتكىزۋ ۋاقىتىن بەلگىلەيتىن فيۋچەرستەرگە عانا قاتىستى. قۇنى كەمىگەن قۇندى قاعازدار تەك امەريكالىق مۇنايدىڭ نارىعىنا كەرى اسەرىن تيگىزدى. وسىعان بايلانىستى مۇناي ءوندىرۋ كومپانيالار ءوز ءونىمىن تومەن باعادا ساتا باستادى. ءتىپتى ءوز تاۋارلارىنىڭ ۇستىنەن اقى قوسىپ بەرىپ جاتتى. ويتكەنى قازىر مۇنايدى ساقتايتىن ورىن دا جوق.

دجيم بۋركحارد، ساراپشى:

- مۇنايعا دەگەن سۇرانىس تومەندەپ كەتتى. ويتكەنى ءونىمدى تۇتىنار ەشكىم جوق. اۋە رەيستەرى توقتاپ، اۆتوكولىك قوزعالىسى ازايعان. ءوز كەزەگىندە، بۇل مۇناي تاۋارباستىلىعىنا الىپ كەلدى. ال ەگەر شيكىزات قولدانىلماسا، ول قويمادا ساقتالۋى كەرەك. ءبىراق وسى جەردە تاعى ءبىر ماسەلە تۋىندايدى: مۇنايدى بەلگىلى ءبىر مولشەردە عانا ساقتاۋعا رۇقسات ەتىلگەن. سايكەسىنشە، قويما سانى دا شەكتەۋلى. وسىعان بايلانىستى قارا التىن باعاسى مينۋسقا كەتىپ وتىر.

جالپى، فيۋچەرستىك كەلىسىمشارتتار نارىعىندا باعانىڭ كۇرت تومەندەۋى الەم ەكونوميكاسىنا ايتارلىقتاي زيان تيگىزە المايدى. جالپى، قازىرگى تاڭدا مۇناي ءوندىرۋشى ەلدەر جاعدايدى تۇراقتاندىرۋ ءۇشىن ناقتى شارالاردى قولعا العان. ماسەلەن، بۇعان دەيىن وپەك+ مۇنايدى ءوندىرۋ كولەمىن شامامەن 10 پروتسەنتكە قىسقارتۋ تۋرالى ورتاق مامىلەگە كەلگەن ەدى. سوعان قاراماستان، شيكىزات كولەمى سۇرانىستان كوپ بولۋ قاۋپى جوعارى، دەيدى ساراپشىلار.

ەندريۋ لەبوۋ، ساراپشى:

- بۇل قيىندىقتى ەندى قالاي ەڭسەرىپ شىعامىز؟ قويمالاردى قالاي بوساتپاقپىز دەگەن سۇراقتار مازالايدى. سەبەبى بۇل - وتە كۇردەلى ماسەلە. ءبىر انىعى، مۇنايعا دەگەن سۇرانىس ارتۋى قاجەت. ءبىراق ادامدار اۆتوكولىككە وتىرىپ نە ۇشاقپەن قاتىنامايىنشا، ا ق ش- تا قارا التىنعا سۇرانىس بولمايدى. جانە مۇنداي جاعداي وتە ۇزاق ۋاقىتقا سوزىلۋى مۇمكىن.

دەسە دە، امەريكالىق فيۋچەرس توڭىرەگىندەگى جاعداي قازىر قايتادان وڭالا باستاعان. ءبىراق ونىڭ باعاسى قانداي بولارىن تەك الداعى ۋاقىتتاعى سۇرانىس پەن ۇسىنىس تەپە- تەڭدىگى عانا ايقىندايدى. ال بۇل ءوز كەزەگىندە كوروناۆيرۋس داعدارىسىنىڭ قاي كەزدە اياقتالىتىنىمەن تىكەلەي بايلانىستى.

www.24.kz