قازاقستاندا كەيىنگى كۇندەرى ۆيرۋس جۇقتىرعاندار نەلىكتەن كوبەيىپ كەتتى - مينيستر جاۋابى

«بىزدە كوروناۆيرۋس جۇقتىرۋ بويىنشا ءوسىم الماتى، نۇر- سۇلتان جانە شىمكەنت قالالارىندا بايقالادى. البەتتە ءبىر تاۋلىكتە 140 ادامعا دەيىن تىركەلۋ جاعدايى حالىقتىڭ ۇرەيىن ۇشىرىپ وتىر. ايتسە دە ەپيدەميا سيپاتىنىڭ ءوزى وسىنداي ەكەنىن ەسكەرۋ كەرەك. ال باسقا مەملەكەتتەردە ۆيرۋس جۇقتىرعانداردىڭ ءبىر كۇندە مىڭداپ تىركەلىپ جاتقانىن دا كورىپ وتىرمىز. ءبارى دە ەپيدەميانىڭ ساتىسىنا بايلانىستى. البەتتە ادامداردىڭ كوپتەپ تىركەلۋىنە ماڭىز بەرۋ كەرەك دەسەك تە، ەپيدەميولوگيالىق كوزقاراس تۇرعىسىنان قارار بولساق، دۇيسەنبىدە 1711 جاعداي بولسا، ەشتەڭە ىستەمەگەن جاعدايدا وسى ادامداردىڭ ءاربىرى ءۇش ادامنان جۇقتىرىپ، ءبىر عانا كۇندە جۇقتىرعانداردىڭ سانى 5 مىڭنان اسىپ كەتەر ەدى. 5 مىڭ ادام تاعى ءبىر تاۋلىك قارالماي قالسا ناۋقاستار سانى 15 مىڭنان اسىپ تۇسەر ەدى»، - دەدى ەلجان ءبىرتانوۆ تەنگرينيۋس Instagram پاراقشاسىنىڭ تىكەلەي ەفيرىندە.

ءمينيستردىڭ ايتۋىنا قاراعاندا، اۋرۋلاردىڭ ءوسىم قارقىنى ەپيدەميانىڭ شىنايى كورىنىسىنەن حابار بەرىپ وتىرادى.

«بىزدە قازىر ءوسىم قارقىنى 8 پايىزدىق دەڭگەيدە. البەتتە بۇل كورسەتكىشكە قاراساق، ناۋقاستار ازايىپ كەلە جاتىر دەپ مۇلدە ايتا المايمىز. ءبىزدىڭ ماقسات - 5 پايىزدان تومەن، ونىڭ ارتىنشا 1 پايىزدان تومەن كورسەتكىشكە دەيىن ازايتۋ. سول كەزدە عانا ەپيدەميانىڭ شىنىمەن باسەڭدەگەنى تۋرالى ايتا الامىز. ياعني جاڭادان انىقتالعان ناۋقاستاردىڭ سانى جازىلعانداردان از بولۋى كەرەك. مىنە، ءبىزدىڭ مىندەت - وسى»، - دەدى ول.

اۆتور: ايان بەكەن ۇلى