دارىگەرلەر مەن پوليتسيا قىزمەتكەرلەرىنە ورازانى توقتاتۋعا رۇقسات ەتىلەدى
بۇل تۋرالى ورتالىق كوممۋنيكاتسيالار قىزمەتى الاڭىندا وتكەن بيىلعى رامازان ايىنا قاتىستى مالىمەتتەر بويىنشا باسپا ءسوز كونفەرەنتسياسىندا ايتىلدى، دەپ حابارلايدى قازاقپارات ءتىلشىسى.
«ءوز قاجەتتىلىگىن قوسپاعاندا، مال- مۇلكى، دۇنيەسى، كۇمىس نيسابىنا جەتكەن، ياعني 127 مىڭ تەڭگەسى بار ادام رامازان ايىندا ءوزى جانە وتباسىسى ءۇشىن ءپىتىر ساداقا بەرۋى مىندەت، ءۋاجىپ بولادى. ءپىتىر ساداقاسى پەندەنىڭ ورازا كەزىندەگى جىبەرىپ العان قاتە- كەمشىلىكتەرىنىڭ وتەۋى ءۇشىن جانە كومەككە مۇقتاج جانداردى ماتەريالدىق قولداۋ ماقساتىندا بەرىلەدى»، - دەيدى ق م د ب ءتوراعاسىنىڭ ورىنباسارى، نايب ءمۇفتي ەرشات وڭعاروۆ. ول قانداي سالاداعى ادامدار ورازانى توقتاتا الاتىنى تۋرالى ايتتى.
«بىرەۋدىڭ ومىرىنە جاۋاپتى ءارى ءزارۋ قىزمەت يەلەرى، ۇشقىش، دارىگەر جانە تاعى دا كەنشى، مەتاللۋرگ سياقتى باسقا اۋىر جۇمىس يەلەرى ورازا ۇستاۋعا شاماسى جەتپەسە ونى كەيىنگە قالدىرا الادى. سونىمەن قاتار، ەلدىڭ قارۋلى كۇشتەرى بەيبىتشىلىك جاعدايىنان سوعىس جاعدايىنا كوشىرىلگەن كەزدە ورازا تۇتۋ اسكەردىڭ قىراعىلىعى مەن جاۋىنگەرلىك دايىندىعىن السىرەتۋگە الىپ بارسا - ورازانى توقتاتۋعا رۇقسات ەتىلەدى. ونىڭ ورنىنا باسقا كۇندەرى ورازا ۇستايدى»، - دەيدى ول. ودان بولەك، ەرشات وڭعاروۆ كوروناۆيرۋس بەلگىلەرى پايدا بولسا ورازانى توقتاتۋ كەرەگىن اتاپ ءوتتى.
«توتەنشە جاعدايدى ەسكەرە كەلە، مۇنداي جاعدايدا بەلگىلى ءبىر اعزانىڭ زاقىمدانۋى، جاڭا اۋرۋدىڭ پايدا بولۋى جانە اۋرۋدىڭ اسقىنۋ ءقاۋپى كۇشەيەتىنىنە بىلىكتى دارىگەر سەنىمدى بولسا - ورازا ۇستاماۋعا رۇقسات ەتىلەدى. كوروناۆيرۋسقا اعزا السىرەپ، اۋرۋ بەلگىلەرى پايدا بولسا - ورازانى توقتاتىپ، باسقا كۇنى ورازا قازاسىن وتەۋگە رۇقسات ەتىلەدى»، - دەدى نايب ءمۇفتي.
سونداي-اق، ول موبيلدى قوسىمشالاردى توتەنشە جاعدايعا بايلانىستى ارنايى شىعارعاندارىن ايتتى. «توتەنشە جاعداي اياقتالعاننان كەيىن دە موبيلدى قوسىمشانى قولدانا بەرۋ جوسپاردا بار. ويتكەنى مەشىتتەگى قارجى اينالىمىنىڭ اشىقتىعىن قالايمىز»، - دەيدى ول.
