نۇر-سۇلتاندا جۇرگەن قوياندارعا قاتىستى مينيسترلىك پىكىر ءبىلدىردى
نۇر-سۇلتان. قازاقپارات - ق ر ەكولوگيا، گەولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار الەمى كوميتەتى ەلوردا كوشەلەرىندە جۇرگەن ور قويانعا قاتىستى ۆيدەوعا پىكىر ءبىلدىردى، دەپ حابارلايدى قازاقپارات ءتىلشىسى.
الەۋمەتتىك جەلىدە مينيسترلىكتەر ءۇيىنىڭ ماڭىندا جۇرگەن قويان تۋرالى ۆيدەو تارادى. ۆيدەو اۆتورى كارانتيننىڭ تابيعاتقا وڭ اسەر ەتىپ جاتقانىن، اڭ-قۇستاردىڭ ادامنان قورىقپايتىنىن ايتادى.
«شىن مانىندە تابيعاتتىڭ جاندانۋىنا كارانتيننىڭ ەش قاتىسى جوق. قويان، تۇلكى، ەلىك سىندى جابايى اڭدار استانامىزدا باياعىدان بار»، - دەپ جاۋاپ بەردى ورمان شارۋاشىلىعى جانە جانۋارلار الەمى كوميتەتىنىڭ باسپا ءسوز حاتشىسى ساكەن دىلداحمەت.
ونىڭ ايتۋىنشا، مينيسترلىكتەر ءۇيىنىڭ ارتىندا، اقوردا جاقتا شاعىن ورمان بار. ۆيدەوداعى قويان سول ورماننان كەلۋى مۇمكىن.
«نۇر-سۇلتاندا اڭ-قۇستىڭ ءتۇر-ءتۇرى بار. 1997-جىلى ەلوردانىڭ جاسىل بەلدەۋى قۇرىلا باستادى جانە ەلباسىنىڭ جىل سايىن تابيعاتقا قىرعاۋىل مەن ەلىك جىبەرۋى داستۇرگە اينالدى. ەسىل وزەنىندە سپورتتىق بالىق اۋلاۋدى دامىتۋ، وزەندەر جۇيەسىن ساقتاۋ ءۇشىن جىل سايىن 200 مىڭ شاباق جىبەرەمىز. ودان بولەك، سۋ بەتىنە اققۋ، قاز، قوقيقازدار ۋاقىتشا قوناقتايدى. قالا ءىشى نەعۇرلىم ورمانعا تولسا، سوعۇرلىم ەكولوگيالىق تەڭگەرىم ساقتالادى»، - دەدى ساكەن دىلداحمەت.
ايتا كەتەيىك، اگەنتتىك ءتىلشىسى «ۆيدەو اۆتورى كارانتين كەزىندە قىدىرىپ جۇرگەنى ءۇشىن جاۋاپقا تارتىلۋى مۇمكىن بە؟» دەگەن سۇراقتى پوليتسيا دەپارتامەنتىنە قويعان ەدى.
«ەگەر شىن مانىندە قىدىرعان بولسا، ارينە جاۋاپقا تارتىلادى. ءبىراق، قازىرگى ۋاقىتتا ول كىسى (ۆيدەو اۆتورى - رەد. ) تۋرالى مالىمەت جوق»، - دەدى نۇر-سۇلتان قالالىق پوليتسيا دەپارتامەنتىنىڭ باسپا ءسوز حاتشىسى ەلميرا شاۋلەنوۆا.
