كوروناۆيرۋس: دەنساۋلىق ساقتاۋ ءمينيسترى قىزمەتىنەن بوساتىلدى

تاۋلىك ىشىندە ۆيرۋستى 3058 ادام جۇقتىرىپ، 204 ادام كوز جۇمعان.

بۇل تۋرالى Agencia Brasil اگەنتتىگىنە سىلتەمە جاساپ قازاقپارات حابارلايدى. وسىعان بايلانىستى برازيليا پرەزيدەنتى جاير بولسونارۋ دەنساۋلىق ساقتاۋ ءمينيسترى لۋيس ەنريكە ماندەتتانى قىزمەتىنەن بوساتتى.

مينيستر ماندەتتا وتستاۆكاعا كەتكەنى تۋرالى اقپاراتتى Twitter- دەگى ءوز اككاۋنتىندا راستادى. برازيليانىڭ جاڭا دەنساۋلىق ساقتاۋ ءمينيسترى بولىپ ونكولوگ دارىگەر نەلسون لۋيس شپەرلە تايش تاعايىندالدى.

رەسمي مالىمەتتەرگە سايكەس، ەلدە كوروناۆيرۋس جۇقتىرعاندار سانى 28320 ادامعا جەتكەن. ىندەتكە شالدىعۋ وقيعالارىنىڭ سانى سەيسەنبى كۇنمەن (12-ءساۋىر) سالىستىرعاندا 12 پايىزعا ءوستى. ۆيرۋستان ەڭ كوپ قايتىس بولعاندار سانى سان-پاۋلۋ قالاسىندا تىركەلگەن (778). بۇل، ريو- دە- جانەيروعا (265) قاراعاندا ءۇش ەسە كوپ بولىپ وتىر.

ودان كەيىن تىزىمدە پەرنامبۋكۋ (143)، سەارا (116) جانە امازوناس (106) شتاتتارى تۇر. ەلدە ءولىم دەڭگەيى 6,1 پايىز دەڭگەيىندە (1736 وقيعا) ساقتالىپ وتىر.