كوروناۆيرۋس پاندەمياسىنان جۇزدەگەن مىڭ بالادان ايىرىلۋىمىز مۇمكىن - ب ۇ ۇ
نيۋ-يورك. قازاقپارات - زەرتتەۋ مالىمەتتەرى بويىنشا، جاڭا كوروناۆيرۋس بالالارعا قاراعاندا ەرەسەكتەر ءۇشىن قاۋىپتى.
الايدا، داعدارىس وسكەلەڭ ۇرپاقتىڭ ءال-اۋقاتىنا ايتارلىقتاي اسەر ەتتى. ال الەۋمەتتىك-ەكونوميكالىق سالدار ءالى دە ۇزاق ۋاقىت سەزىلەتىن بولادى.
ب ۇ ۇ ساراپشىلارىنىڭ باعالاۋىنشا، بيىل جۇزدەگەن مىڭ بالا قايتىس بولۋى ىقتيمال. ولار پاندەميا بولماعاندا، امان قالۋى مۇمكىن ەدى. بۇل تۋرالى ب ۇ ۇ- نىڭ جاڭا بايانداماسىندا جازىلعان، دەپ حابارلايدى قازاقپارات «ب ۇ ۇ جاڭالىقتارىنا» سىلتەمە جاساپ.
«بيىل 42-66 ميلليون بالا كەدەيلىكتىڭ زاردابىن شەگۋى مۇمكىن. 188 ەلدەگى 1,5 ميلليارد كامەلەتكە تولماعاندار مەن جاستار وكىلدەرى ءبىلىم بەرۋ مەكەمەلەرىنە بارمايدى. مەملەكەتتەردىڭ ۇشتەن ەكىسى قاشىقتان وقىتۋدى ەنگىزدى، ءبىراق بارلىق ەلدە مۇنداي مۇمكىندىك جوق. ساراپشىلار ءماجبۇرلى دەمالىس بالالاردىڭ دامۋىنا قالاي اسەر ەتەتىنىن باعالاۋدى ءالى قولعا العان جوق.
بالالاردىڭ قايتىس بولۋ جاعدايلارىنىڭ سانى سوڭعى ءۇش جىلداعى بالالار ءولىم-جىتىمىنە قارسى كۇرەستەگى جەتىستىكتەردى جوققا شىعارا وتىرىپ، جۇزدەگەن مىڭ ادامعا ارتادى. بۇل ەسەپتەۋلەردە قايتا جۇكتەلگەن دەنساۋلىق ساقتاۋ جۇيەسى اياسىندا تۋىنداعان مەديتسينالىق قىزمەت كورسەتۋ پروبلەمالارى ەسكەرىلمەگەن - بۇل جەكە ماسەلە. ازىرشە ماسەلە باسقا فاكتورلاردا بولىپ وتىر: مىسالى، 143 ەلدەگى 368,5 ميلليون بالا تاڭعى اسىن مەكتەپتە الادى، قازىر ولاردىڭ كوپشىلىگى قاجەتتى تاماقپەن قامتاماسىز ەتىلمەي وتىر»، - دەلىنگەن باياندامادا.
بۇدان بولەك، اتاپ وتىلگەندەي، بالالار وقشاۋلاۋ رەجيمىنە شىدامايدى، بۇل ولاردىڭ پسيحيكالىق دەنساۋلىعىنا كەرى اسەر ەتەدى. اسىرەسە، وقشاۋلاۋ ورتالىقتارىندا وتىرعان بوسقىندار مەن ميگرانتتاردىڭ بالالارى وسال بولىپ كەلەدى.
«بايانداما اۆتورلارىنىڭ قورىتىندىسى كۇمان تۋعىزبايدى. بالالاردى وسى قاۋىپتەردەن قورعاۋ ءۇشىن ءبىز ءدال قازىر ارەكەت ەتۋىمىز كەرەك»، - دەدى ب ۇ ۇ باس حاتشىسى انتونيۋ گۋتەرريش قۇجاتتى ۇسىنا وتىرىپ.
ب ۇ ۇ ساراپشىلارى حالىققا ءبىلىم الۋعا ۇمتىلۋعا، اتا-انالارعا ۇيدە ەرىكسىز وتىرۋ جاعدايىندا بالالارمەن قارىم-قاتىناس جاساۋ داعدىلارىن ۇيرەتۋدى ۇسىنادى. باياندامادا ايتىلعانداي، كارانتين رەجيمىن كەزەڭ-كەزەڭىمەن الىپ تاستاۋ كەزىندە، ەڭ الدىمەن، بالالارعا قىزمەت كورسەتەتىن مەكەمەلەردىڭ جۇمىسىن قالپىنا كەلتىرۋ قاجەت.
