تۇركىستان وبلىسى قىلمىس ەڭ از جاسالاتىن ءوڭىر - ستاتيستيكا

بۇل، وتكەن جىلدىڭ ۇقساس كەزەڭىمەن سالىستىرعاندا 23,9 پايىز از، دەپ حابارلايدى قازاقپارات ق ر ۇلتتىق ەكونوميكا مينيسترلىگى ستاتيستيكا كوميتەتىنە سىلتەمە جاساپ.

ق ر باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپ كوميتەتىنىڭ دەرەكتەرى بويىنشا، ءبىرىنشى توقساندا رەسپۋبليكاداعى قىلمىس دەڭگەيى 10 مىڭ تۇرعىنعا شاققاندا 118 تىركەلگەن قىلمىستى قۇرادى.

وبلىستار مەن رەسپۋبليكالىق ماڭىزى بار قالالار بولىنىسىندە 10 مىڭ تۇرعىنعا شاققانداعى ەڭ جوعارى قىلمىس دەڭگەيى الماتى، شىمكەنت، نۇر-سۇلتان، شىعىس قازاقستان، باتىس قازاقستان، قوستاناي جانە اقمولا وبلىستارىندا، ەڭ تومەنگى كورسەتكىش - تۇركىستان وبلىسىندا.

«اۋىر جانە اسا اۋىر قىلمىستار سانى وتكەن جىلدىڭ ۇقساس كەزەڭىمەن سالىستىرعاندا 119,8 پايىز ارتتى. قىلمىستار قۇرىلىمىندا ولاردىڭ ۇلەس سالماعى 20,3 پايىز (2019-جىلدىڭ 1-توقسانىندا - 9,3 پايىز)، اۋىرلىعى ورتاشا جانە تومەن 33,8 پايىز (66,5 پايىز) جانە 12,4 پايىز (14.0 پايىز) بولدى»، - دەلىنگەن اقپاراتتا.

قىلمىستاردىڭ اراسىندا ەڭ ۇلكەن ۇلەستى مەنشىككە قارسى قىلمىستار قۇرايدى - 72,7 پايىز (2019-جىلدىڭ ءبىرىنشى توقسانىندا - 76,4 پايىز)، ولاردىڭ كوپشىلىگى باسقا بىرەۋدىڭ مۇلكىن ۇرلاۋعا قاتىستى بولدى - 23,7 مىڭ وقيعا (39,4 مىڭ). سونداي-اق الاياقتىق جاعدايلارى 10,2 پايىز ارتتى. ادامعا قارسى قىلمىستار سانى 3230 وقيعانى قۇرادى، بۇل وتكەن جىلدىڭ سايكەس كەزەڭىمەن سالىستىرعاندا 9,8 پايىز از.

ادام ساۋداسى - 50,0 پايىز، زورلاۋ - 36,6 پايىز، ادام ۇرلاۋ - 34,8 پايىز، قورقىتۋ 19,5 پايىز تومەندەدى. ال ادام ءولتىرۋ قىلمىستارى وتكەن جىلمەن سالىستىرعاندا 26,1 پايىز كوبەيگەن.

«رەسپۋبليكادا ادام ءولتىرۋ دەڭگەيى 100 مىڭ تۇرعىنعا شاققاندا 1,5 قۇرايدى. وبلىستار مەن رەسپۋبليكالىق ماڭىزى بار قالالار بولىنىسىندە 100 مىڭ ادامعا شاققانداعى ادام ءولتىرۋدىڭ ەڭ جوعارى دەڭگەيى پاۆلودار، جامبىل، قاراعاندى، اقمولا وبلىستارىندا، ەڭ تومەنى تۇركىستان وبلىسىندا بايقالادى»، - دەلىنگەن رەسمي ستاتيستيكادا.

رەسپۋبليكانىڭ قۇقىق قورعاۋ ورگاندارى قىلمىس جاساعان 21,2 مىڭ ادامدى انىقتادى (2019 -جىلدىڭ 1-توقسانىمەن سالىستىرعاندا 17,5 پايىز از)، 9,2 مىڭ ادام قىلمىستىق جاۋاپكەرشىلىككە تارتىلدى (5,6 پايىز از). قىلمىس جاساعان بارلىق انىقتالعان ادامداردىڭ كوپشىلىگى جۇمىسسىزدار - 83,8 پايىز (2019-جىلدىڭ ءبىرىنشى توقسانىندا 84,2 پايىز) قۇرادى.

ورتاشا العاندا قازاقستاندا قىلمىس جاساعان ءاربىر سەگىزىنشى ادام - ماس كۇيىندە، ءاربىر توعىزىنشى ادام توپ قۇرامىندا بولعان.

قىلمىس جاساعان ادامداردىڭ جالپى سانىنان 510 ادام نەمەسە 2,4 پايىز - كامەلەتكە تولماعاندار، بۇل وتكەن جىلدىڭ سايكەس كەزەڭىمەن سالىستىرعاندا 25,2 پايىز از.

قىلمىسقا بارعانداردىڭ: 89 ى - 14-15 جاستاعى بالالار (2019-جىلدىڭ ءبىرىنشى توقسانىندا - 162) نەمەسە كامەلەتكە تولماعان قۇقىق بۇزۋشىلاردىڭ 17,5 پايىزى، 421 ءى - 16-17 جاستاعىلار نەمەسە 82,5 پايىز.