تۇركىستاندىق تۇرعىنداردىڭ ەركىن ءجۇرىپ-تۇرۋىنا شەكتەۋ قويىلدى

بۇل تۋرالى جەدەل شتاب جيىنى كەزىندە قالا اكىمى راشيد ايۋپوۆ مالىمدەدى، دەپ حابارلايدى قازاقپارات ءتىلشىسى.

قالا باسشىسىنىڭ ايتۋىنشا باس مەملەكەتتىك سانيتارلىق دارىگەر قاۋلىسىنا وراي شاھاردا ءبىرقاتار شەكتەۋ ەنگىزىلەدى.

«دۇيسەنبى سيتۋاتسيالىق ورتالىق جۇمىسىن باستاپ، وعان پوليتسيا، توتەنشە جاعداي، تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ، دارىگەرلەر جانە اكىمدىكتىڭ ءار سالا ماماندارى تارتىلادى. بەينەكامەرا ورناتىلىپ، ديسپەتچەرلىك بايلانىس ءنومىر قاراستىرىلادى»، - دەدى راشيد ابات ۇلى.

شاھار باسشىسىنىڭ تاپسىرماسىنا سايكەس، ەندىگى جەردە قوعامدىق كولىكتىڭ قوزعالىسىنا دا شەكتەۋ قويىلادى. تەك تاڭەرتەڭ 7.30-10.00 جانە كەشكىسىن 17.30-20.00 ارالىعىندا ءبىر رەت قانا باعىتقا قاتىنايدى.

تۇرعىندارعا «التىن بۇلاق» كوتەرمە ساۋدا بازارىنان دۇكەندەرگە جونەلتىلگەن ازىق-تۇلىك جەتكىزىلەدى. ودان بولەك، تاپسىرىس ارقىلى قىزمەت كورسەتۋگە 22 كولىك دايىن. الدىمەن، كۇرىش، ماكارون، كارتوپ، ءسابىز، ورامجاپىراق، پياز، تۇز، كۇنباعىس مايىنا تاپسىرىس قابىلدانسا، سۇرانىس بويىنشا ءتىزىمى ۇلعاياتىن بولادى. سونداي-اق، حيميالىق تۇرمىستىق زاتتار دا بار.

جەتكىزۋ قىزمەتىنە ءدارىحانا، ءدامحانالار مەن مەيرامحانالار دا قوسىلادى. ول ءۇشىن ءاربىر تۇرعىن ۇيالى تەلەفوندارىنا «Amazing Turkistan» قوسىمشاسىن جۇكتەپ السا، كەرەكتى زاتتارىنا تاپسىرىس بەرە الادى.

ايتا كەتەيىك، قالا اكىمدىگىنىڭ 6 موبيلدى توبى مەن پوليتسيا قىزمەتكەرلەرى جۇرتشىلىقتى قاجەتسىز سىرتقا شىقپاۋ بويىنشا ءتۇسىندىرۋدى باستاپ كەتتى. سونداي-اق، بلوك بەكەتتەردەگى باقىلاۋ جۇمىسى قاتاڭ قاداعالاۋعا الىنعان.