الماتى ەكونوميكاسى كەزەڭ- كەزەڭمەن قالپىنا كەلتىرىلمەك

قازىر قالادا پ ت ر تاسىلىمەن بارلىق قاۋىپ توبىنداعى ادامداردى ەكسپرەسس تەستىلەۋ باستالدى. بۇل توپقا 193 مىڭ ادام كىرەدى. ولار اسكەري قىزمەتشىلەر، پوليتسيا، دارىگەرلەر، ەرىكتىلەر، جۇك جانە جولاۋشىلار تاسىمالى كولىكتەرى، تەمىرجولشىلار، قۇرىلىسشىلار، ءىرى نىساندا جۇمىس ىستەپ جاتقان جۇمىسشىلار، ينتەرناتتار مەن ازىق- تۇلىك كاسىپورىندارىنىڭ قىزمەتكەرلەرى، تۇرعىن- ءۇي كوممۋنالدىق شارۋاشىلىق سالاسىنىڭ جۇمىسشىلارى.

استىرتىن وشاقتاردى تابۋدىڭ جاڭا الگوريتمىنە سايكەس، قالادا ەپيدەمياعا قارسى شارالار قابىلدانىپ جاتىر. اكىمنىڭ ايتۋىنشا، كۇشەيتىلگەن كارانتين اياسىندا قالادا كوپتەگەن كاسىپورىندار مەن ۇيىمدار جۇمىس ىستەپ جاتىر. بۇل كاسىپورىنداردا 210 مىڭ جۇمىسشى قىزمەت ەتەدى. ال كارانتين اياسىندا 727,8 مىڭ جۇمىس ورنى قىسقارعانى انىقتالدى. قاشىقتان جۇمىس ىستەۋگە ءبىلىم بەرۋ، مەملەكەتتىك باسقارۋ، اقپارات پەن بايلانىس سالاسىندا 200 مىڭ ادام شىققان. ناتيجەسىندە 300 مىڭ ادام تابىسسىز قالعان.

«قالانىڭ الەۋمەتتىك- ەكونوميكالىق احۋالىن كەزەڭ- كەزەڭىمەن قالپىنا كەلتىرۋ جوسپارىنا سايكەس، ەكونوميكالىق بەلسەندىلىكتى جانداندىرۋ ءۇشىن ۇلكەن الەۋەتى بار جانە سونىمەن قاتار كوروناۆيرۋستىق ينفەكتسيانى تاراتۋ قاۋپى ەڭ تومەن سەكتورلار انىقتالدى. بۇل - ونەركاسىپ پەن قۇرىلىس سالالارى. وسى سالالار قاجەتتى سانيتارلىق- ەپيدەميولوگيالىق تالاپتاردى ساقتاي وتىرىپ 20 - ساۋىردەن باستاپ ىسكە قوسىلۋى مۇمكىن»، - دەدى قالا اكىمى باقىتجان ساعىنتايەۆ. ونەركاسىپ سالاسىنداعى شەكتەۋلەردى الىپ تاستاۋ ناتيجەسىندە 42,2 مىڭ ادام ءوز جۇمىس ورىندارىنا ورالادى. قۇرىلىس ماۋسىمىنىڭ باستالۋىنا وراي، سونداي- اق «جۇمىسپەن قامتۋدىڭ جول كارتاسى» جانە جاڭا جوبالاردى ىسكە اسىرۋعا باعىتتالعان «نۇرلى جەر» باعدارلاماسى اياسىندا 34,5 مىڭ جاڭا جۇمىس ورنىن اشۋ، اسىرەسە قۇرىلىس سالاسىندا، جوسپاردا بار. سونىمەن قاتار، اۋقىمدى قۇرىلىس جۇمىستارىنىڭ باستالۋىمەن جوبالاۋشىلار مەن ىزدەستىرۋشىلەرگە، ينجينيرينگتىك كومپانيالار (اۆتورلىق جانە تەحنيكالىق قاداعالاۋ)، جوبالاردى ساراپتاۋ سياقتى ماماندار مەن قىزمەتتەر كاتەگوريالارىنا قاجەتتىلىك پايدا بولادى. بۇدان وزگە قۇرىلىس سالاسىنىڭ ۇزدىكسىز جۇمىس ىستەۋىن قامتاماسىز ەتۋ ماقساتىندا كوتەرمە قۇرىلىس نارىعىن اشۋ قاجەت.

وسىلايشا، وسى سالا بويىنشا جۇمىسپەن قامتىلعانداردىڭ سانى 45,3 مىڭ ادامعا ۇلعايادى. سونداي- اق، «ب ج ك-2025» جانە «قاراپايىم زاتتار ەكونوميكاسى» باعدارلامالارىن ىسكە اسىرۋعا قاتىساتىن كاسىپكەرلەردىڭ كەپىل مۇلكىن مەملەكەتتىك تىركەۋ ءۇشىن نوتاريۋستار مەن ح ق ك و قىزمەتىن قايتا باستاۋ جوسپارلانىپ وتىر.

الدىن الا دەرەكتەر بويىنشا، 20 - ساۋىردەن باستاپ جۇمىسپەن قامتىلعانداردىڭ جالپى سانى ءبىر اي ىشىندە 89,4 مىڭ ادامعا كوبەيەدى. شەكتەۋلەردى كەزەڭ- كەزەڭمەن الىپ تاستاۋ قوعامدىق كولىكتەردى، سونىڭ ىشىندە ايالدامالار مەن مەترو ايالدامالارىن، كاسىپورىنداردىڭ وزدەرىنىڭ جۇمىس ورىندارى مەن حالىق كوپ جينالاتىن ورىنداردى جاپپاي زالالسىزداندىرۋمەن قاتار جۇرەدى.