كارانتيندە جاتقان اقتاۋ تۇرعىنى: كوز الدىمدا بولعان وقيعانى ەشقاشان ۇمىتپايمىن

اقتاۋ. قازاقپارات - اقتاۋدا 14-شاعىناۋدانداعى كارانتينگە جابىلعان ءۇيدىڭ تۇرعىنى الەنا كاباكوۆا سول وقيعانىڭ قالاي وربىگەنى جايلى ايتتى.

ول وسىعان دەيىن كورونوۆيرۋس انىقتالعان ناۋقاستارمەن ءبىر پودەزدە تۇرعان، دەپ حابارلايدى قازاقپارات ءتىلشىسى.

-6-ءساۋىر كۇنى 14-شاعىناۋدانداعى ۇيدەن 2 ناۋقاس انىقتالىپ، ءبىر پودەزدىڭ تۇتاستاي تۇرعىندارى 14 كۇنگە كارانتينگە وقشاۋلانعانى بەلگىلى. سول كۇنگى جاعدايدى ەشقاشان ەسىمنەن شىعارمايمىن دەپسىز. قالاي بولدى؟ وسىدان باستايىق.

- ءبارىمىز العاش رەت كوروناۆيرۋس تۋرالى جاڭالىقتاردان ەستىدىك. كەيبىرەۋىمىز ءتىپتى سەنبەدىك، بىزگە كەلمەيدى دەپ ويلادىق. ءبىراق اقتاۋدا ىندەتكە قارسى باستالعان شارالاردى كورىپ، وتباسىمىزبەن ساقتىق شارالارىن قابىلداي باستادىق. ماسكا مەن قولعاپ كيدىك، ءوز قولىممەن ءار ءتۇرلى قوسپالاردى قوسىپ انتيسەپتيك جاسادىم. دايىندالۋىم بەكەر ەمەس ەكەن. جەكسەنبى 5-ءساۋىر كۇنى كەشكە دۇكەنگە نان الۋعا كەتكەن كەلىنىم جۇگىرىپ كەلىپ، ەسىكتىڭ الدىندا پوليتسيانىڭ تولىپ جۇرگەنىن، بارلىعىنا ۇيلەرىنەن شىقپاۋدى سۇراپ جاتقانىن ايتقاندا تاڭعالدىم.

كورشىمنىڭ بالكونىنا بارىپ، نە بولعانىن ءوز كوزىممەن كورەيىن دەدىم. سەبەبى مەنىڭ تەرەزەم تەڭىزگە قارايدى. دالادا فورماداعى ءتارتىپ ساقشىلارى تولىپ ءجۇر. دەرەۋ سىرتتا جۇرگەن كورشىمە تەلەفون سوعىپ، نە بولعانىن سۇراي باستادىم. ول ءبىزدىڭ پودەزدەگى ءبىر پاتەردە ناۋقاستار بار ەكەنىن ايتتى. كەيىن جەدەل جاردەم كولىگى كەلىپ، ىشىندەگى دارىگەرلەر ارنايى كوستيۋممەن شىقتى. تاس توبەمە سۋ قۇيعانداي بولدى. اياعىم دىرىلدەپ، قاتتى قورىقتىم.

دارىگەرلەر سول كەشتە ءۇش ايەلدى الىپ كەتتى. ابىر- سابىر. دۇرلىگۋ. تۇسىنبەي قالدىق. تەك كۇتۋ كەرەكتىگىن بىلدىك. ءتۇرلى قاڭقۋ سوزدەر تاراپ كەتتى. قايسىنا سەنەرىڭدى بىلمەيسىڭ. رەسمي اقپاراتتى كۇتتىك. سوندا دا ونداي جاعداي تىركەلمەسە ەكەن دەپ ۇمىتتەندىك. سول كۇنى كەشكە كورشىلەرىمىزبەن بىرلەسىپ پودەزدى حلورمەن جۋىپ الدىق. ەرتەڭگى كۇنى پوليتسەيلەردىڭ كەتپەگەنىن، قورشاۋ قويىلعانىن كورىپ، راس ەكەنىنە كوزىم جەتتى. مىنە، تاڭەرتەڭ ءبىز كۇتكەن اقپارات جاريالاندى: «ماڭعىستاۋدا 5 جاعداي تىركەلدى، ونىڭ ەكەۋى بۇگىن تاڭەرتەڭ انىقتالدى» - دەلىنگەن حابارلامادا.

كەيىن وبلىستىق ىشكى ساياسات باسقارماسىنىڭ باسشىسى ەرجان كۇمىسقاليەۆ ورتالىق كوممۋنيكاتسيالار ورتالىعىندا «كەشە كەشكە 4 ادامدى كوروناۆيرۋس جۇقتىرۋى مۇمكىن دەگەن بولجاممەن الىپ كەتتى، ونىڭ ەكەۋىنەن ناتيجە راستالدى. ولار وزبەكستاننان كەلگەن ازاماتشالار. وسىعان دەيىن 3-ساۋىردە انىقتالعان قىزىلوردا تۇرعىنىمەن بايلانىستا بولعان» - دەپ اقپارات بەردى.

ءبىز وسىلايشا كارانتيندەگى ءومىرىمىزدى باستاپ كەتتىك. وتاعاسىن جۇمىس ۋاقىتشا بوساتتى. بالالار كومپيۋتەر الدىندا. تەك ۋاقىتتىڭ ءوتۋىن كۇتتىك. ەشقاشان كوز الدىمنان كەتپەيدى.

- كەلەسى كۇنى دەزينفەكتسيا جۇمىستارى جۇرگىزىلدى. كارانتينگە جابىلعاندارىڭىزدى حابارلادى. مۇنى قالاي قابىلدادىڭىزدار؟

- ءيا، وقشاۋلاندىق. كارانتين باستالعان ساتتەن باستاپ، دوموفون ارقىلى ج ە ك-تىڭ باسشىسى تەلەفون ءنومىرىمدى سۇراپ الدى. WhatsApp جەلىسىندە ءبىزدىڭ پودەزدىڭ تۇرعىندارىن، جەك وكىلى جانە اكىمدىك قىزمەتكەرلەرىنىڭ باسىن قوساتىن توپ اشىپ جاتىر ەكەن. تاڭەرتەڭمەن تۇگەلدەي 500 مەتر اۋماققا دەيىن دەزينفەكسيا جۇمىستارى ىستەلدى. ءار پاتەرگە سانيتار ماماندارى كوستيۋممەن كەلىپ، كارانتين ەرەجەسىن ءتۇسىندىردى. چاتتا بىزگە وزىمىزگە قاجەتتى زاتتارىمىز بەن ازىق- تۇلىكتى ارنايى جاسالعان ساڭىلاۋدان اكىمدىك قىزمەتكەرلەرى مەن پوليتسەيلەر الىپ بەرەتىنىن ايتتى. پودەزگە ماسكا مەن قولعاپپەن شىعۋىمىز ەستكەرتىلدى. قوقىس تاستاۋ دا شەشىلدى. ياعني، پودەزدەگى ەسىكتىڭ الدىنا قويامىز دەپ شەشتىك. ءارى قاراي، جەك قىزمەتكەرلەرى وزدەرى كۇن سايىن الىپ كەتەدى.

- شىنىمدى ايتسام، قولداۋ كورسەتۋشىلەر كوپ. ءبىز ءۇشىن الاڭدايتىن دا شىعار. اكىمدىك قىزمەتكەرلەرى مەن جەك وكىلدەرى قانداي كومەك كەرەكتىگىن كۇندە سۇرايدى. ءبىزدىڭ جۇمىسسىز، ۇيىندە جاتقان كورشىمىز بار. سوعان ءبىز كورشىلەر بولىپ كومەكتەسەتىنبىز. مىنانداي جاعدايدا شىعۋعا دا قورقاسىڭ. سوندىقتان ماماندارعا حابارلادىق. اكىمدىكتەن جاستار كەلىپ، ءوز قالتالارىنان تاماق الىپ بەرگەن ەكەن. ريزا بولىپ قالدىق. جەدەل قىزمەت ەتكەن اقتاۋ قالالىق اكىمدىگىنە العىسىمدى ايتقىم كەلەدى. وسىنداي قيىن- قىستاۋ زاماندا بىرلەسە اتقارعان ەڭبەك ءبارىن جەڭبەك.

- 14 كۇن بويى كورشىلەرىڭىزبەن ارالاسىزدار عوي. جاقىن تۋىستاي بولىپ كەتكەن شىعارسىزدار؟ !..

- ولارمەن ءبىر ءۇيدىڭ بالاسىنداي بولىپ كەتتىك. كارانتين بىتكەن سوڭ، باسىمىز جينالىپ، دالاعا ساياحاتقا شىعۋدى جوسپارلاپ قويدىق. كۇندە كىتاپ، كينو الماسامىز. وقشاۋلانۋدىڭ ءبىر جاعىنان كومەگى ءتيدى. وسىندايدا الەمدە جاقسى ادامداردىڭ كوپ ەكەنىن، اينالادان تەك جاقسىلىق كۇتۋ كەرەكتىگىن بىلەسىڭ. ادامزاتقا ادامگەرشىلىكتى ەسىنە سالعانداي بۇل دەرت. ال كارانتين بۇل ىندەتتى تاراتپاۋدىڭ جالعىز جولى.

- سۇحباتتاسقانىڭىزعا راحمەت!

اۆتور: ءلايلىم ءالىم