ديماش قۇدايبەرگەن كوروناۆيرۋسپەن كۇرەسكە ءان ارنادى
ديماشتىڭ «We Are One « (ءبىز بىرگەمىز) اتتى جاڭا انىنە تۇسىرىلگەن بەينەبايان «ۆكونتاكتە» الەۋمەتتىك جەلىسىندەگى «شينحۋا جاڭالىقتارى Xinhua News» پاراقشاسىندا جاريالاندى. بەينەباياندا ۆيرۋستىڭ العاشقى وشاعى - ۋحان قالاسى - دارىگەرلەر، ۆولونتەرلەر، ماسكا تاققان ادامدار، گۋمانيتارلىق كومەكتىڭ قابىلدانۋى، دۇكەننىڭ بوس قالعان سورەلەرى كورسەتىلگەن. ۆيدەو سوڭىندا اسپانداعى بۇلت سەيىلىپ، دارىگەرلەردىڭ قۋانىشى، ماسكالارىن شەشىپ تاستاعان بالالاردىڭ ءماز- مەيرام كەزى كورسەتىلگەن. «بۇكىل الەم كوررناۆيرۋسپەن كۇرەسىپ، باسىنان قيىن كۇندەردى وتكىزىپ جاتىر. اتى جامان اۋرۋعا قارسى كۇش بىرىكتىرىپ، ءبىر- بىرىمىزگە قول ۇشىن سوزعاندا عانا COVID-19-دى جەڭە الامىز.
بۇل ءان الدىڭعى شەپتە جۇرگەن دارىگەرلەر مەن وقشاۋلانىپ وتىرعاندارعا ارنالادى»، - دەلىنگەن بەينەبايان سيپاتتاماسىندا.
«We Are One « - ءانىنىڭ ءسوزىن Gao Shang/Shang Yang, ال اۋەنىن Dong Nan/Tang Yi جازعان.
ديماش جاڭا ءانى تۋرالى ءوزىنىڭ Instagram-پاراقشاسىنا ءالى جاريالاماسا دا، ونىڭ ونەرىن باعالاۋشىلار بەينەباياندى تالقىلاپ جاتىر.
«بۇل ءان قايعى، قيىندىق، سونىمەن قاتار ءبىر-بىرىمىزگە قول ۇشىن سوزعان جاعدايدا قيىندىقتى ەڭسەرەتىنىمىزگە سەنۋ تۋرالى. باستىسى - ونى جەڭەتىنىمىزگە سەنىم مەن ءۇمىتتى جوعالتپاۋ...»، - دەپ جازدى «ۆكونتاكتە» قولدانۋشىسى پولينا پولينسكايا ديماشتىڭ ەۋرازيالىق فان-كلۋبىنىڭ پاراقشاسىنا.
بۇعان دەيىن ديماش قۇدايبەرگەن كوروناۆيرۋسپەن كۇرەسىپ جاتقان مەديتسينا قىزمەتكەرلەرىنە العىس ايتقان بولاتىن.
سونداي-اق، ول جانكۇيەرلەرىنەن پاندەميا كەزىندە ۇيدە وتىرۋدى ءوتىندى. 15-ناۋرىزدا ديماش «Arnau tour» دۇنيەجۇزىلىك تۋرنەسىن كەيىنگە شەگەرگەنى بەلگىلى بولدى. 14-ساۋىردە ول مامىر ايىندا توكيودا ءوتۋى كەرەك كونسەرتتىڭ بولمايتىنىن ايتتى.
ەسكە سالا كەتسەك، كەشە وپەرا ءانشىسى، «استانا وپەرانىڭ» جەتەكشى سوليسى مايرا مۇحامەد قىزى بارلىق دارىگەرگە ارنالعان «بۇكىلالەمدىك دۇعانى» ورىندادى. بەينەبايان ق ر مادەنيەت جانە سپورت مينيسترلىگى، «حابار» اگەنتتىگى ا ق جانە «استانا وپەرا» مەملەكەتتىك وپەرا جانە بالەت تەاترىنىڭ بىرلەسۋىمەن ءتۇسىرىلدى.
