ماسكەۋلىك سيرك قاراعاندىدا قالىپ قويدى

ەلدە كارانتين باستالعالى 50-گە جۋىق حايۋانعا تاماق تاۋىپ بەرۋ دە قيىنداعان. بۇل ماسەلە الەۋمەتتىك جەلىدە كوتەرىلگەن سوڭ قاراعاندىلىقتار جاپپاي كومەك قولىن سوزدى. ءبىراق سيرك ارتىستەرى ماسكەۋگە قاشان جانە قالاي جەتەتىندەرىن بىلمەيدى.

جوسپار بويىنشا بۇل ايۋلار مەن مايمىلدار سونداي- اق يتتەر ەرەكشە قويىلىمنىڭ كەيىپكەرى بولۋى ءتيىس ەدى. سسەناريعا ساي ولار قاراعاندىلىق مۋزىكانتتارمەن ساحنا تورىندە ءسان- سالتانات قۇرۋى كەرەك بولعان. الايدا كارانتين ەنگىزىلىپ، جوسپار كۇرت وزگەردى. سونىڭ سالدارىنان ونەرپازداردىڭ جارتىسى ەلدەرىنە كەتسە، قالعان حايۋاناتتارعا قاراۋى ءتيىس 17 ادام قاراعاندىدا قالىپ قويعان.

الەكساندر پوپوۆ، ماسكەۋ سيركىنىڭ پروديۋسەرى:

- ەگەر ءبىز باسقا جاققا بارساق، بىزدەگى حايۋاناتتاردى ەشكىم دە ءوز قاراماعىنا المايدى. سەبەبى ولاردا دا كارانتين بولىپ جاتىر. ونىڭ ۇستىنە ۆەتەرينارلىق تالاپ بار. ال ءبىزدىڭ وسىندا ءالى قانشا وتىراتىنىمىز بەلگىسىز، سول جاعى قيىنداۋ بولىپ تۇر.

50-گە جۋىق حايۋاننىڭ ءبىر ايلىق تاماعىنا جارتى ميلليون تەڭگەدەن استام قارجى كەرەك دەيدى ارتىستەر. مەيماندار باسىندا بار ازىق- تۇلىكتى ءوز قارجىسىنا ساتىپ الىپ وتىرىپتى. الايدا قازىر قالتاسىنىڭ ءتۇبى كورىنە باستاعاندىقتان كومەك سۇراۋعا ءماجبۇر. ءبىر كۇن وتپەستەن قاراعاندىلىقتار 2 اپتاعا جەتەتىن ازىق- تۇلىك اكەلىپ بەرىپتى.

الەكساندرا ماسلوۆا، قالا تۇرعىنى:

- قازىر وقشاۋلانىپ جاتقان حايۋاندارعا قانداي كومەك كەرەك ەكەن دەپ بارلىعىمىز اقىلداستىق تا، ەڭ كەرەك دەگەندەرىن الىپ كەلدىك. ايۋلارعا قويۋلاتىلعان ءسۇت پەن پوۆيدلو، مايمىلدارعا كامپيتگ، شۇجىق. بۇدان وزگە دە تاعامدار الدىق. ال جەمىس- جيدەكتەردى باسقالارى ونسىزدا قاپ- قاپتان اكەلىپ جاتىر ەكەن.

قازىر جەرگىلىكتى ۆەتەرينارلار ارنايى كەلىپ حايۋانداردى قاداعالاپ ءجۇر. سوندىقتان ولاردىڭ دەنساۋلىعىنا تونگەن قاۋىپ جوق كورىنەدى. ال ونەرپازدار بەلگىسىز ۋاقىتقا سوزىلعان گاسترولدىڭ تەزىرەك اياقتالۋىن عانا تىلەپ وتىر.