كوروناۆيرۋس جۇقتىرعان اقتوبەلىككە قاتىستى قىلمىستىق ءىس قوزعالۋى مۇمكىن

ال بايلانىستا بولعان ادامدارىن جاسىرىپ قالعان اقتوبەلىككە قاتىستى قىلمىستىق ءىس قوزعالۋى مۇمكىن، دەپ حابارلايدى قازاقپارات ءتىلشىسى.

اقتوبە وبلىسىندا كەشە 1 ادامنان، بۇگىن تاڭەرتەڭ تاعى 1 ادامنان كوروناۆيرۋس ينفەكسياسى انىقتالدى. قازىر بارلىعى 13 ادامنىڭ ىندەت جۇقتىرعانى بەلگىلى.

«بۇگىن ساعات 8:35 دە ءبىر ادامنان ىندەت انىقتالدى. ول بۇرىن كوروناۆيرۋس جۇقتىرعان اداممەن بايلانىستا بولعان. قازىر بارلىعى 13 ادام تىزىمگە ءىلىندى. كەشە جانە بۇگىن تىركەلگەن دەرەككە توقتالسام، ولار 2-ءساۋىر كۇنى اۋىرىپ، جەكە ەمحاناعا بارعان ەر اداممەن بايلانىستا بولعان. سول ەر ادام تۋىسىنىڭ ۇيىنە بارعانىن، وعان زات قالدىرعانىن بىزدەن جاسىرىپ قالدى. قىلمىستىق كودەكستىڭ «ادامداردىڭ ومىرىنە نەمەسە دەنساۋلىعىنا قاۋىپ توندىرەتىن ءمان-جايلار تۋرالى اقپاراتتى جاسىرۋ» بابى بويىنشا ماتەريال جيناقتالىپ، قۇقىق قورعاۋ ورگاندارىنا جىبەرىلەدى. ەگەر ونىڭ كىناسى دالەلدەنسە، جاۋاپقا تارتىلادى. سونىمەن بىرگە جۇقتىرعان ادامى كوز جۇمسا، 5 جىلدان 10 جىلعا دەيىن باس بوستاندىعىنان ايىرىلۋى مۇمكىن»، - دەدى وبلىستىق تاۋارلار مەن كورسەتىلەتىن قىزمەتتەر ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى نۇرسۇلۋ بەركىمبايەۆا.

قازىرگى كەزدە سوڭعى تىركەلگەن ناۋقاس تۇرعان ءۇيدىڭ پودەزى كارانتينگە جابىلدى. دەزينفەكسيالاۋ جۇمىسى جۇرگىزىلدى. بارلىعى 28 ادام باقىلاۋعا الىنىپ، قارىم-قاتىناستا بولعان 6 ادام وقشاۋلاندى.

ايتا كەتەيىك، ۆيرۋس جۇقتىرعان اقتوبەلىك بىرنەشە رەت ازىق-تۇلىك سۋپەرماركەتىنە بارعان. وبلىستىق تاۋارلار مەن كورسەتىلەتىن قىزمەتتەر ساپاسى مەن قاۋىپسىزدىگىن باقىلاۋ دەپارتامەنتى ونى كارانتينگە جابۋعا شەشىم قابىلدادى. سونىمەن بىرگە ساۋدا ورنىنىڭ جۇمىسشىلارى دا ۇيدەگى كارانتيندە بولادى.

«اقتوبە قالاسىندا كارانتين رەجيمى جالعاسادى. بارلىق شەكتەۋلەر ءوز كۇشىندە. قانداي دا ءبىر قاجەتتىلىك بولماسا، دالاعا شىعۋعا بولمايدى. ۇيدەن جۇمىسقا، جۇمىستان تۋرا ۇيگە بارۋ قاجەت. ءدارىحاناعا بارسا دا بىردەن ۇيىنە ورالعانى دۇرىس»، - دەيدى نۇرسۇلۋ بەركىمبايەۆا.

اۆتور: التىناي ساعىندىقوۆا