كوروناۆيرۋستى قالاي انىقتايدى؟
نۇر-سۇلتان. قازاقپارات - ەلوردادا ءساۋىردىڭ توعىزى مەن 13 ارالىعىندا 4766 ادامعا ەكسپرەسس تەست جاسالىپ، اعزاسىندا ۆيرۋستىڭ بار- جوعى تەكسەرىلدى. سولاردىڭ 61 نەن ينفەكتسيا انىقتالعان، دەپ حابارلايدى «حابار 24» .
جالپى مۇنداي سىنامالار قازىر نۇر- سۇلتان جانە الماتى قالالارىندا جاسالادى. كوروناۆيرۋستىڭ بار- جوعىن انىقتايتىن تەست تاپسىرۋ ءۇشىن الدىمەن ارنايى سايتتا ساۋالناما تولتىرۋ شارت. كەيىن دياگنوستيكالىق ورتالىق وپەراتورى سىزگە حابارلاسىپ، قاي جەرگە، قاي ۋاقىتتا كەلۋ كەرەكتىگىن ايتادى. مۇنداعى ءتارتىپ بويىنشا ءتولقۇجاتتى ءوز قولىڭىزدا ۇستاپ تۇرىپ، كورسەتەسىز. سونىمەن قاتار تەست تاپسىرۋعا كەلگەندەر تىركەۋ تەرەزەسىنە جاقىن تۇرماۋ ءۇشىن ەدەنگە ارنايى سارى جولاق سىزىپ قويعان. كوروناۆيرۋستىڭ بار- جوعىن انىقتايتىن تەستتى ءسىزدىڭ كوزىڭىزشە اشىپ كورسەتەدى. وعان تىركەۋدە بەرگەن ارنايى شتريح كود جابىستىرادى. سودان كەيىن ساۋساقتان قان الىپ، ونى تەستكە تامىزادى. بۇل تەست تەگىن. ءبىراق بارلىعىنا بىردەي جاسالمايدى. تەست تاپسىراتىن ادامداردىڭ ءتىزىمىن دەنساۋلىق ساقتاۋ مينيسترلىگى ەپيدەميولوگيالىق انىقتاماعا ساي بەكىتەدى. مۇندا الدىمەن ينفەكتسيا جۇقتىرۋ قاۋپى جوعارى ازاماتتار ەسكەرىلەدى.
