تۋىسىمەن تەلەفون ارقىلى قوشتاسىپ جاتقان ناۋقاستى كورۋ جانىڭا باتادى - ت. لۋيس
نۇر- سۇلتان. قازاقپارات - بۇگىندە نيۋ- يورك دارىگەرلەرى ازاماتتاردى كوروناۆيرۋستەن اراشالاپ قالۋ ءۇشىن دامىلسىز جۇمىس ىستەپ جاتىر، دەپ حابارلايدى «حابار 24».
سونداي ادامداردىڭ ءبىرى، تامارا لۋيس ەسىمدى مەدبيكە. ۆيرۋسپەن كۇرەستە تاۋلىك بويى تىكەسىنەن تىك جۇرگەن ماماننىڭ ايتۋىنشا، جۇمىستىڭ ەڭ قيىن تۇسى - ناۋقاستىڭ قايتىس بولعانىن كورۋ.
مەدبيكە مۇنداي ساتتەرگە اسا قاتتى ءمان بەرمەۋگە تىرىسقانىمەن، كەيدە كوڭىلى بوساپ، كوزىنە جاس الاتىنىن ايتادى.
تامارا لۋيس، مەدبيكە:
- مەن دە اداممىن عوي. ادامداردىڭ توسەك تارتىپ، اۋىر دەرتتەن كوز جۇمعانىن كورۋ وتە قيىن. جاعدايى مۇشكىل ناۋقاستىڭ ءوز تۋعان- تۋىسىمەن تەلەفون ارقىلى قوشتاسىپ جاتقانىن كورۋ دە جانىڭا باتادى.
