اقمولا وبلىسىندا الەۋمەتتىك ورتالىقتا قىزمەت ەتەتىن جۇكتى ايەل كوروناۆيرۋس جۇقتىرعان

وبلىس بويىنشا اتالمىش دەرتكە شالدىققاندار سانى 73- ءتى قۇرادى، ونىڭ تورتەۋى كوز جۇمدى، دەپ حابارلايدى قازاقپارات ءتىلشىسى وبلىستىق دەنساۋلىق ساقتاۋ باسقارماسىنا سىلتەمە جاساپ.

«كوكشەتاۋ قالاسىنىڭ تۇرعىنى 1995 -جىلعى ايەل COVID-19 تابىلعان 1998 -جىلعى ەر اداممەن جاقىن بايلانىستا بولعان. ول ناۋرىزدىڭ 25-دە قوناققا بارعان، وندا الماتىدان كەلگەن قوناقتار بولعان. جالپى، اتالمىش وتباسى بويىنشا 6 ادامنىڭ بايلانىستا بولعانى انىقتالدى. ونىڭ 4- ۋى ءۇي كارانتينىنە الىنعان. ياعني، 2005 -جىلعى جاسوسپىرىم اقمولا وبلىستىق كوپ بەيىندى وبلىستىق بالالار اۋرۋحاناسىنىڭ، ال 1967 -جىلعى ەر ادام اقمولا وبلىستىق تۋبەركۋلەزگە قارسى ديسپانسەرىنىڭ پروۆيزورلىق ستانسيونارىنا اسقىنعان رەسپيراتورلى ۆيرۋستى ينفەكسيا دياگنوزىمەن جاتقىزىلدى. وسى جاعداي بويىنشا بايلانىستى بولعان 31 ادام انىقتالدى. ولاردىڭ ىشىندە 27 ادام جاقىن بايلانىستا بولسا، تاعى 4 ادام سول بايلانىستا بولعانادامدارمەن قاتىناسقان. ولاردىڭ اراسىندا 4 ادام كارانتيندىك ستانتسيونار جانە 2 ادام پرۆيزورلىق ستانسيونارعا ورنالاستىرىلدى»، - دەيدى اقمولا وبلىسىنىڭ دەنساۋلىق ساقتاۋ باسقارماسىنداعىلار.

ۆەدومستۆودان اتاپ وتكەندەي، اقمولا وبلىستىق تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ ماماندارى سانيتارلىق- ەپيدەميولوگيالىق شارالاردى جۇرگىزۋدە.

«ەكىنشى جاعداي سەلينوگراد اۋدانىندا 1994 -جىلعى جۇكتى ايەلدەن (جۇكتىلىگى 18-20 اپتا) انىقتالدى. ول «شاپاعات» الەۋمەتتىك قىزمەت كورسەتۋ ورتالىعىندا سانيتار بولىپ جۇمىس ىستەگەن، وسىندا كوروناۆيرۋس تابىلعان اداممەن بايلانىستا بولعاندىقتان كارانتيندىك ستانتسيوناردا جاتقان»، - دەپ تولىقتىردى دەنساۋلىق ساقتاۋ باسقارماسىنداعىلار.

ايتا كەتەيىك، قازىرگى كەزدە وڭىردەگى ستانتسيونارلاردا بارلىعى 364 ناۋقاس بار، ونىڭ ىشىندە 65 ادام ينفەكسيالىق، 183 ادام پروۆيزورلىق جانە 116 ادام كارانتيندىك ستانتسيوناردا. ال، ءۇي كارانتينىندە 554 ادام بار.

اۆتور: اسلان وسپانوۆ