تاراۋىق نامازى مەشىتتەردە جاماعاتپەن وقىلمايدى – ق م د ب
نۇر- سۇلتان. قازاقپارات - اركىم تاراۋىق نامازىن ءوز شاڭىراعىندا وتباسى مۇشەلەرىمەن وقۋى كەرەك. بۇل تۋرالى باس ءمۇفتي ناۋرىزباي قاجى تاعان ۇلى ءمالىم ەتتى، دەپ حابارلايدى قازاقپارات ءتىلشىسى.
«قازاقستان مۇسىلماندارى ءدىني باسقارماسى ەلىمىزدەگى توتەنشە جاعدايعا بايلانىستى قاسيەتتى رامازان ايىندا ىندەتتىڭ تارالۋىنىڭ الدىن الۋ ماقساتىندا، كارانتين مەرزىمىندە تاراۋىق نامازى مەشىتتەرىمىزدە جاماعاتپەن وقىلمايتىنىن مالىمدەيدى. اركىم تاراۋىق نامازىن ءوز شاڭىراعىندا وتباسى مۇشەلەرىمەن وقۋىنا كەڭەس بەرەمىز. ءبىز وسىلاي وقشاۋلانۋ ارقىلى جۇقپالى ىندەتتى جەڭەمىز»، - دەدى باس ءمۇفتي ورتالىق كوممۋنيكاتسيالار قىزمەتىندەگى بريفينگىدە.
كارانتين كۇندەرى اركىم ءوز شاڭىراعىندا وتباسى مۇشەلەرىمەن اۋىزاشار وتكىزۋى كەرەك.
«جۇقپالى ىندەتتىڭ تارالۋىنىڭ الدىن الۋ ماقساتىندا مەشىتتەردە، ءدامحانالاردا، قوعامدىق ورىنداردا جانە باسقا دا مەكەمەلەردە جينالىپ، اۋىزاشار بەرۋدى ۋاقىتشا توقتاتۋعا شاقىرامىز. سوندىقتان كارانتين كۇندەرى اركىم ءوز شاڭىراعىندا وتباسى مۇشەلەرىمەن اۋىزاشار وتكىزۋگە، كوپشىلىك ورىنداردا ء(دامحانا، مەيرامحانا) جينالماۋعا ۇندەيمىز»، - دەدى باس ءمۇفتي ورتالىق كوممۋنيكاتسيالار قىزمەتىندەگى بريفينگىدە.
وسى ورايدا ول قازىرگى جاعدايعا قاراي، ورازا ۇستاعان ادامدارعا اۋىزاشار بەرۋدە ءتيىستى قايىرلى امالداردى جۇزەگە اسىرۋعا شاقىردى. بۇل تۇرعىدا مەيرامحانالارعا تاپسىرىس بەرىپ، اۋىزى بەرىك ادامدارعا تاماق تاراتۋ، الەۋمەتتىك جاعدايى تومەن وتباسىلارعا ازىق- تۇلىك تاراتۋ ارقىلى اۋىز اشتىرۋ، اۋىزاشارعا جۇمسالاتىن شىعىنداردى ورازا ۇستاعان ادامدارعا قارجىلاي بەرۋ سەكىلدى امالداردى ۇسىندى.
«قاسيەتتى ايدا كوبىرەك يگى ءىس جاساۋعا اسىعايىق. اتا- انامىزدىڭ، ۇلكەن كىسىلەردىڭ دۇعاسىن الايىق. تۋىستارىمىزدان حابار الىپ، حال- جاعدايىن سۇرايىق. مۇمكىندىككە قاراي، مۇقتاج جاندارعا قول ۇشىن بەرىپ، ناۋقاستىڭ كوڭىلىن سۇرايىق»، - دەدى ناۋرىزباي قاجى تاعان ۇلى.
