د د ۇ باسشىسى پاندەمياعا قاتىستى شەكتەۋلەردى باسەڭدەتۋگە اسىقپاۋعا شاقىردى
نيۋ- يورك. قازاقپارات - دۇنيەجۇزىلىك دەنساۋلىق ساقتاۋ ۇيىمىنىڭ باسشىسى تەدروس گەبرەيەسۋس COVID-19 پاندەمياسىنا بايلانىستى ەنگىزىلگەن شەكتەۋلەردى الىپ تاستاۋ ماسەلەسىنە وتە ساق قاراۋعا شاقىردى.
ءبىرقاتار ەلدەردە كوروناۆيرۋستىڭ تارالۋى باسەڭدەي ءتۇستى. وسى ورايدا، بيلىك وكىلدەرى «الەۋمەتتىك قاشىقتىقتى» ساقتاۋعا باعىتتالعان شارالاردى توقتاتۋ تۋرالى ويلانا باستادى. بۇل تۋرالى ب ۇ ۇ جاڭالىقتار ورتالىعىنا سىلتەمە جاساپ قازاقپارات حابارلايدى.
ددۇ باسشىسى COVID-19 - كوروناۆيرۋستىڭ ەڭ جاڭا ءتيپى ەكەنىن، جانە مەديتسينالىق قاۋىمداستىق تا، دەنساۋلىق ساقتاۋ قىزمەتكەرلەرى دە ول تۋرالى ونىمەن كۇرەس جۇرگىزۋ بارىسىندا تانىسىپ وتىرعانىن اتاپ ءوتتى. ال ىندەتپەن كۇرەس ستراتەگياسى ءوز كەزەگىندە ەڭ سوڭعى مالىمەتتەرگە نەگىزدەلەدى. ۆيرۋستىڭ قالاي قوزعالاتىنىن، ونى قالاي توقتاتۋ جانە ودان قالاي قورعانۋ كەرەكتىگىن ءتۇرلى ەلدەردىڭ تاجىريبەسى كورسەتۋدە.
«ءبىز COVID-19 وتە تەز تارايتىنىن جانە ولىمگە اپاراتىنىن ءبىلىپ وتىرمىز: ول 2009 -جىلعى گريپپ ەپيدەمياسىنا قاراعاندا 10 ەسە كوپ ادامدى ءولتىردى. ۆيرۋس ادامدار كوپ جينالاتىن جەرلەردە، مىسالى، قارتتار ۇيىندە تەز تارالاتىنىن بىلەمىز. ۆيرۋستىڭ تارالۋىن ۇستاپ قالۋ ءۇشىن ءاربىر وقيعانى دەر كەزىندە انىقتاپ، تەست جاساپ، ىندەت جۇقتىرعان ءار ادامدى ۋاقىتىلى وقشاۋلاۋ جانە ەمدەۋ كەرەكتىگىن بىلەمىز. كەيبىر ەلدەردە اۋرۋ جۇقتىرعان ادامداردىڭ سانى ءاربىر 3-4 كۇن سايىن ەكى ەسەلەنىپ جاتقانىن ءبىلىپ وتىرمىز»، - دەدى تەدروس گەبرەيەسۋس.
ونىڭ ايتۋىنشا، قاتاڭ شارالاردى كەزەڭ- كەزەڭمەن باسەڭدەتۋ قاجەت. «بۇل قادامعا تۇراقتى قاتاڭ باقىلاۋ جاساي وتىرىپ جانە دەنساۋلىق ساقتاۋ جۇيەسى ينفەكسيانى جۇقتىرۋدىڭ جاڭا جاعدايلارىن ۋاقىتىلى انىقتاپ، ەمدەي الاتىن جاعدايدا، سونداي- اق ونىڭ قايتالانۋ جاعدايلارىنا دايىن بولعان كەزدە عانا بارۋ قاجەت»، - دەدى ول.
بۇل رەتتە كەيبىر ەلدەر شەكتەۋلەردى جۇمسارتۋ مۇمكىندىگىن قاراستىرسا، باسقالارى ولاردى ەنگىزۋ تۋرالى ويلانۋدا. بۇل لاتىن امەريكاسى، افريكا جانە ازياداعى تابىسى تومەن ەلدەر. «مەن ادامدار اراسىنداعى قاشىقتىقتى شەكتەۋ - الدىن الۋ ءۇشىن قاجەتتى شارالار كەشەنىنىڭ ءبىرى عانا ەكەنىن كوپ رەت ايتتىم. ءاربىر ۇكىمەت جاعدايدى باعالاپ، ءوز ازاماتتارىن قورعاي الۋ كەرەك»، - دەدى د د ۇ باسشىسى.
دوكتور تەدروس د د ۇ COVID-19 ىندەتىنە بايلانىستى شەكتەۋلەردى الىپ تاستاۋعا نەگىز بولاتىن التى جاعداي جازىلعان جاڭارتىلعان ستراتەگيانى جاريالايتىنىن ايتتى.
