جەدەل جاردەمگە كۇنىم تۇسپەسىن دەسەڭ، ۇيدە وتىر: قازاقستاننىڭ ءبىرقاتار وڭىرىندە ەرەكشە اكسيا ءوتتى

«جەدەل جاردەمگە كۇنىم تۇسپەسىن دەسەڭىز، ۇيدە وتىرىڭىز» دەگەن ۇرانمەن وتكەن اكسيانىڭ ماقساتى - حالىققا كارانتين تالاپتارىن ساقتاۋدىڭ ماڭىزىن كورسەتۋ، وسىلايشا تۇرعىنداردىڭ جاۋاپكەرشىلىگىن ارتتىرۋ، دەپ حابارلايدى قازاقپارات.

اتالمىش شارا تۋرالى دەنساۋلىق ساقتاۋ ءمينيسترى ەلجان ءبىرتانوۆ Facebook پاراقشاسىندا جازدى.

«جارايسىڭدار، ارىپتەستەر. قولداعاندارىڭىز ءۇشىن راحمەت. دوستار، تاعى ءبىر مارتە ەسكە سالا كەتەيىن - قازىر توتەنشە جاعداي تالاپتارىن قاتاڭ ساقتاۋدىڭ ماڭىزى وتە زور. ۇيدە جانە تابيعات اياسىندا كوپ ادام شاقىرىپ، توي جاساماڭىزدار، ساۋىق كەشىن وتكىزبەڭىزدەر. بۇل اسىرەسە وڭىرلەردەگى حالىققا تىكەلەي قاتىستى. نۇر-سۇلتان مەن الماتىدا COVID-19 جۇقتىرعاندار سانى الدەقايدا ازايدى، بۇل كارانتين تالاپتارىن ساقتاۋدىڭ ارقاسىندا عانا مۇمكىن بولىپ وتىر. الايدا وبلىستاردا ناۋقاستار سانى كۇننەن كۇنگە ءوسىپ جاتىر»، - دەپ جازادى مينيستر.

ونىڭ ايتۋىنشا، بۇل - وتە جىلدام تارايتىن ىندەت. «ەلىمىزدەگى كوروناۆيرۋسقا شالدىققانداردىڭ 80 پايىزى - وسىلاي بىرەۋمەن بايلانىسىپ جۇقتىرعان. سوندىقتان 2/2/2 ەرەجەسىن ساقتاڭىزدار، بۇل دەگەنىمىز - تاعى 2 اپتا ۇيدە وتىرۋ، ءبىر-ءبىرىمىزدىڭ ارامىزدا 2 مەتر قاشىقتىق ساقتاۋ جانە ەكى ادامنان ارتىق جينالماۋ»، - دەيدى ەلجان ءبىرتانوۆ.