دۇكەنگە باراتىن رۇقساتناما، بلوكپوستتىڭ بولماۋى جانە ۇشۋ اپپاراتتارى - قازاقستاندىق ايەل دۋبايداعى كارانتين تۋرالى ايتىپ بەردى

- اينۇر حانىم، ءوزىڭىز تۋرالى ايتىپ بەرىڭىزشى، بىرنەشە جىلدان كەيىن ەلگە ورالۋىڭىزعا نە سەبەپ بولدى؟

- دۋبايداعى كارانتين كۇشەيە تۇسكەندىكتەن، قازاقستانعا قايتا ۇشۋ قاجەت دەپ شەشتىم. ونىڭ ۇستىنە، ەلىمىزدىڭ سىرتقى ىستەر مينيسترلىگى قازاقستانعا سوڭعى رەيس ۇشاتىنىن مالىمدەگەن ەدى. قازىر امىرلىكتەردە ءتارتىپ كۇشەيدى، دۇكەنگە دە ارنايى رۇقساتپەن بارۋ قاجەت. ونىڭ ۇستىنە دۋبايدا ءومىر ءسۇرۋ دەڭگەيى قىمبات، ال كوپتەگەن ادامدار جۇمىسسىز قالىپ، ەڭبەكاقىسىنان ايىرىلىپ، تىعىرىققا تىرەلىپ جاتىر. مەن وندا 7 جىل بويى جىلجىمايتىن مۇلىك بويىنشا اگەنت بولىپ جۇمىس ىستەدىم. بۇل كاسىپپەن اينالىساتىن ادامدار وتە كوپ. ال قازىر پاندەمياعا بايلانىستى تابىس ءتۇسىپ جاتقان جوق. ءتىپتى انامنىڭ جوسپارلانعان ساپارىن كەيىنگە قالدىردىق.

- قازاقستانعا ۇشىپ كەلگەندە ەش قيىندىق تۋىندامادى ما؟

- بارلىعىمىز مەديتسينالىق ماسكامەن، تىڭعىلىقتى دايىندىقپەن ۇشتىق. ءتىپتى كوزىلدىرىك پەن باس كيىم كيگەن جولاۋشىلار كوپ بولدى. ەلگە كەلگەندە جۇگىمىز دە، ءوزىمىز دە دەزينفەكسيالىق تازارتۋدان وتتىك. بارلىعى جوعارى دەڭگەيدە بولدى جانە ءبىزدى بىرنەشە اۆتوبۋسقا ءبولىپ، ساناتورييلەر مەن اۋرۋحانالارعا جەتكىزدى.

- ءسىزدى قانداي عيماراتقا ورنالاستىردى؟ ءبىر بولمەدە نەشە ادام بار؟

- ءبىزدى تالدىقورعان قالاسىنداعى قوناقۇيگە جايعاستىردى، ءبىر بولمەدە 3 ادامنان جاتىرمىز. بىزگە كارانتيندەگى ءجۇرىپ- تۇرۋ ءتارتىبىن ءتۇسىندىردى. تاماق اكەلگەندە دە بىزگە اسا جاقىنداماۋعا تىرىسادى. مۇنداعى تاعامدار دا جاقسى، كۇنىنە بەس رەت تاماقتاندىرادى. ونىڭ ىشىندە ەت، مانتى سەكىلدى ءتۇر- ءتۇرى بار. وسىنداي جاعداي جاساعانى ءۇشىن بيلىك پەن كونسۋلدارعا العىس ايتامىن.

- تۋعان- تۋىستارىڭىزبەن قالاي سويلەسىپ تۇراسىز؟

- مۇندا ينتەرنەت بار. ءبىراق، بەينەبايلانىس بىرەۋدە جۇكتەلسە، بىرەۋدە جۇكتەلمەيدى. مەن ءوز جاقىندارىممەن WhatsApp مەسسەندجەرى ارقىلى سويلەسەمىن.

- كارانتيندە جاتقانىڭىزعا نەشە كۇن بولدى؟ قاي كۇنى شىعارايىن دەپ جاتىر؟

- مەنىڭ كەلگەنىمە ءۇش كۇن بولدى. بارلىق قاجەتتى تەستىلەۋدەن وتتىك، بىزدەن ەش ۆيرۋس تابىلمادى. سوندىقتان، بۇگىن نەمەسە ەرتەڭ ءبىزدى ۇيىمىزگە جەتكىزەدى. ءبىز وقشاۋلانۋ كەزىندە وتىراتىن مەكەنجايىمىزدى بىرنەشە رەت كورسەتتىك. الەۋمەتتىك جەلىدە تالدىقورعان تۇرعىندارى ءبىزدى ينفەكسيا جۇقتىرادى دەپ الاڭداپ جاتىر ەكەن. بۇل مۇمكىن ەمەس، سەبەبى مۇنداعى ءتارتىپ وتە قاتال. كوشە تۇگىلى بولمەمىزدەن دالىزگە شىعۋعا تىيىم سالىنعان. سوندىقتان، بىردە- ءبىر بايلانىس بولمايدى. ۇيدە وقشاۋلاناتىن مۇمكىندىگى جوقتار، ياعني جەكە بولمەسى جوق، 65 جاستان اسقان تۋىسى بار تۇرعىندارعا دا مەملەكەتتىك مەكەمەلەردە وقشاۋلانۋعا جاعداي جاسالعان.

- ءسىز قازاقستان مەن بىرىككەن اراب امىرلىكتەرىندەگى كارانتيندى كوردىڭىز. ەكى ەلدى سالىستىرار بولساڭىز، قاي ەلدىڭ تالاپتارى كۇشتىرەك بولىپ وتىر؟

- مەن قازاقستانداعى كارانتيندى ءالى كورگەن جوقپىن. ارنايى رەيستى، اۋەجايدى جانە قوناقۇيدەگى كارانتيندى ايتار بولسام، ءبارى جۇيەلەنگەن. دۋبايدا ءتىپتى دۇكەنگە رۇقساتسىز شىعارمايدى. ول ءۇشىن ارنايى فورما تولتىرۋ قاجەت. بۇل قاعازبەن دۇكەنگە، جۇمىسقا جانە ءدارىحاناعا عانا بارۋعا بولادى. جۇمىسقا دا مەديتسينالىق ماماندار، پوليتسەيلەر، ازىق- تۇلىك جەتكىزۋشىلەر سەكىلدى اسا قاجەت ماماندار عانا بارادى. دۋبايدا دا قاتاڭ شارالار قولعا الىنىپ جاتىر. وندا بلوكپوستتار قويىلماعان، تەك پوليتسيا ءتارتىپ كۇزەتىپ تۇرادى. ءار اۋلادا بەينەباقىلاۋ كامەراسى بار پوليتسيا كولىگى بار، كەي جەرلەردە درون ۇشىپ ءجۇر.

- مۇنداي شارانىڭ بارلىعى شىنىمەن قاجەت پە؟

- ارينە، بارلىق الدىن الۋ شارالارىن ۇستانۋ قاجەت. امىرلىكتەردەگى كوپتەگەن دوستارىم كوروناۆيرۋس ينفەكسياسىمەن اۋىردى. بۇل جاي عانا تۇماۋ نەمەسە جرۆي ەمەس، ونى ەمدەۋ جولىن دا ەشكىم بىلمەيدى. ماسەلەن، ءابۋ- دابيدەگى تانىسىم كوروناۆيرۋس جۇقتىردى. سەبەبى، وندا دۋبايداعىداي قاتاڭ تالاپتار قويىلماعان.

- ارنايى بورت جولاۋشىلارى اراسىندا كوروناۆيرۋس جۇقتىرعاندار بولدى ما؟

- جوق، ءبىزدىڭ جولاۋشىلار اراسىنان كوروناۆيرۋس تابىلمادى. سوندىقتان، ءبىزدى ءۇي كارانتينىنە جىبەرگەلى جاتىر. مەديتسينالىق ماماندار بىزگە تەلەفون ارقىلى نەمەسە ۇيگە كەلىپ، كارانتين تالاپتارىن ساقتاعانىمىزدى تەكسەرەدى. 24 كۇن بويى ۇيدە بولۋىمىز كەرەك.

- كارانتين مەن وقشاۋلانۋدى ءار ادام ءارتۇرلى قابىلدايدى. اسىرەسە، پسيحولوگيالىق تۇرعىدا قيىن تيەتىنى بايقالدى. وقشاۋلانۋدى ءوز باسىنان وتكەرگەن ادام رەتىندە قانداي كەڭەس بەرەر ەدىڭىز؟

- ەڭ الدىمەن، بويىمىزعا قيىن جۇكتەمەلەر ارتپاۋ قاجەت. كوپتەگەن ادامدار كارانتيندە بۇرىن- سوڭدى جاساپ كورمەگەن ىستەردى قولعا الۋدا. وعان قاراعاندا، قالىپتى ۇيرەنشىكتى ءريتمدى ساقتاپ قالعان دۇرىسىراق. دەنساۋلىق ءۇشىن جاتتىعۋلار جاساپ، دارۋمەن ءىشىپ، تۋىستارعا حابارلاسۋ كەرەك. سونىمەن بىرگە، قازىرگى ۋاقىتتا ادامنىڭ ءوزىن نەگاتيۆتى جاڭالىقتاردان دا وقشاۋلاعانى ماڭىزدى بولىپ وتىر.

- ۋاقىت ءبولىپ، سۇحباتتاسقانىڭىز ءۇشىن راحمەت!

اۆتور: ايجان سەرىكجان قىزى