توتەنشە جاعداي كەزىندە قانداي تاۋارلاردى ەكسپورتتاۋعا تولىق تىيىم سالىنعان

«مينيسترلىككە اۋىل شارۋاشىلىعى ونىمدەرىن ەكسپورتتاۋدى شەكتەۋ جانە تىيىم سالۋ بويىنشا كوپتەگەن ساۋالدار كەلىپ تۇسۋدە. اقپارات الۋ ءۇشىن فەرمەرلەر دە، جۋرناليستەر دە جۇگىنۋدە. سوندىقتان كوپتى تولعاندىرعان ساۋالدارعا ناقتى جانە تولىق اقپارات دايىندالدى»، - دەلىنگەن ق ر ا ش م باسپا ءسوز قىزمەتى تاراتقان حابارلامادا.

اعىمداعى جىلدىڭ 2-ساۋىرىندە رەسپۋبليكا كولەمىندە ازىق-تۇلىك قورى قايتا ناقتىلانىپ، تالداۋدان كەيىن، سونداي-اق ترەيدەرلەر مەن ءاشتو وتىنىشتەرىنە بايلانىستى ق ر اۋىل شارۋاشىلىعى ءمينيسترىنىڭ «قازاقستان رەسپۋبليكاسىنىڭ اۋماعىنان جەكەلەگەن تاۋارلاردى شىعارۋدىڭ كەيبىر ماسەلەلەرى تۋرالى» №111-جاڭا بۇيرىعى دايىندالدى. قۇجات ق ر ساۋدا جانە ينتەگراتسيا مينيسترلىگىمەن كەلىسىلدى جانە 2020 -جىلعى 1-قىركۇيەككە دەيىن قولدانىسقا ەنگىزىلەدى. اتالمىش نورماتيۆتىك اكتتە تاۋارلاردىڭ تىزبەسى قايتا قارالعان جانە «قازاقستان رەسپۋبليكاسىنىڭ اۋماعىنان ءۇشىنشى ەلدەرگە جەكەلەگەن تاۋارلاردى شىعارۋعا تىيىم سالۋدى ەنگىزۋ تۋرالى» 2020 -جىلعى 22-ناۋرىزداعى بۇرىنعى بۇيرىقتىڭ كۇشىن جويادى.

اتاپ ايتقاندا، №111-بۇيرىعىنىڭ №1-قوسىمشاسىندا قازاقستان رەسپۋبليكاسىنىڭ اۋماعىنان شىعارۋعا تىيىم سالىنعان تاۋارلاردىڭ تىزبەسى كورسەتىلگەن.

وندا: - قاراقۇمىق؛ - اق قانت؛ - كارتوپ؛ - بالعىن نەمەسە سالقىنداتىلعان پياز، شالوت پيازى، سارىمساق، پورەي پيازى جانە وزگە دە بادانالىق كوكونىستەر؛ - كۇنباعىس، ۇنتاقتالعان نەمەسە ۇنتاقتالماعان تۇقىمدارى؛ - كۇنباعىس مايى؛ - قاراقۇمىق جارماسى بار.

№ 2-قوسىمشادا ەلدەن شىعارۋعا (ەكسپورتتاۋعا) شەكتەۋلەر (كۆوتالار) ەنگىزىلەتىن تاۋارلاردىڭ تىزبەسى بەكىتىلدى. بۇل: - ءسابىز، شالقان (رەپا)، قىزىلشا؛ - ورامجاپىراق، ءتۇرلى- ءتۇستى ورامجاپىراق، كولرابي، جاپىراقتى ورامجاپىراق جانە جانە Brassica تەكتەس وسىعان ۇقساس جەۋگە جارامدى كوكونىستەر؛ - بيداي نەمەسە قارا بيداي ۇنى؛ - جۇمساق بيداي جانە مەسلين.

№3-قوسىمشادا شەكتەۋلەردى ەسەپتەۋ جانە ءبولۋ ءتارتىبى بەلگىلەنگەن. ەكسپورتقا ەنگىزىلگەن كۆوتالار جانە ىشكى نارىققا ءونىمدى كەپىلدى جەتكىزۋ كولەمى اعىمداعى جىلدىڭ 1-قىركۇيەگىنە دەيىن اي سايىن انىقتالاتىن بولادى.

بەلگىلەنگەن ەرەجەلەر بويىنشا ق ر ا ش م ەسەپتى (كەلەسى) ايدىڭ باستالۋىنا دەيىن كەمىندە 12 جۇمىس كۇن بۇرىن رەسمي ينتەرنەت- رەسۋرستا تاۋارلاردىڭ ءاربىر ءتۇرى بويىنشا كۆوتالار كولەمىن، تىركەلگەن باعاسى بار ق ر ىشكى نارىعىنا كەپىلدەندىرىلگەن جەتكىزىلىمدەر كولەمىن، سونداي- اق وتىنىمدەردى قابىلداۋدىڭ باستالۋ جانە اياقتالۋ كۇنى مەن ۋاقىتى تۋرالى اقپاراتتى جاريالايتىن بولادى.

كۆوتالار مەن كەپىلدى جەتكىزىلىمدەر كولەمىن ق ر ا ش م ءوندىرىس، تۇتىنۋ، اكىمدىكتەردىڭ قورلارداعى ازىق- تۇلىك كولەمى تۋرالى بەرگەن اقپاراتىنا سۇيەنە وتىرىپ جانە «قازاقستاننىڭ استىق وداعىنىڭ»، «قازاقستاننىڭ استىق وڭدەۋشىلەر وداعىنىڭ»، «قازاقستاننىڭ كارتوپ وسىرۋشىلەر جانە كوكونىس وسىرۋشىلەر وداعىنىڭ» ۇسىنىستارى نەگىزىندە ەسەپتەيدى.

كۆوتالاردى الۋ ءۇشىن فەرمەرلەر مەن ترەيدەرلەرگە ەسەپتى اي باستالعانعا دەيىن 7 جۇمىس كۇنىنەن كەشىكتىرمەي ءوز وتىنىمدەرىن سالالىق وداقتارعا بەرۋى قاجەت، ولار ءوز كەزەگىندە وتىنىمدەردى قالىپتاستىرادى. كۆوتالاردى ەسەپتەۋ جانە ءبولۋ ەرەجەسىمەن تولىعىراق مىنا سىلتەمە بويىنشا تانىسۋعا بولادى. № 111-بۇيرىقتى مىنا سىلتەمە ارقىلى كورۋگە بولادى. وتىنىمدەر مەن باسقا دا قۇجاتتاردىڭ نىساندارى مىنا سىلتەمە بويىنشا قولجەتىمدى.

«قورىتىندىلاي كەلە، ق ر تىس جەرلەرگە اۋىل شارۋاشىلىق ونىمدەرىن ەكسپورتتاۋعا تىيىم سالۋ جانە شەكتەۋلەر توتەنشە جاعداي كەزىندە حالىقتى ۇزدىكسىز جانە كەپىلدى تۇردە قاجەتتى ازىق- تۇلىك تاۋارلارىمەن قامتاماسىز ەتۋ ءۇشىن ءماجبۇرلى جانە ۋاقىتشا ەنگىزىلگەنىن شارا ەكەنىن اتاپ وتكىمىز كەلەدى. ازاماتتاردى اتالمىش جاعدايعا تۇسىنۋشىلىكپەن قاراۋعا شاقىرامىز. سونداي- اق، ەكسپورتقا قاتىستى سوڭعى جاڭالىقتارمەن تانىس بولۋ ءۇشىن ق ر اۋىل شارۋاشىلىعى مينيسترلىگىنىڭ جاريالاعان حابارلاندىرۋلارىن قاداعالاپ وتىرۋلارىڭىزدى سۇرايمىز. كەيبىر وڭىرلەردە ازىق-تۇلىك تاۋارلارىن وتكىزە الماي جاتسا، ال ەلىمىزدىڭ كەلەسى وڭىرىندە اتالمىش تاۋارعا جەتىسپەۋشىلىك تىركەلگەن. وسىعان بايلانىستى ق ر ا ش م جەرگىلىكتى اتقارۋشى ورگانداردى باسقا وڭىرلەرمەن بەلسەندى جانە جۇيەلى نەگىزدە ازىق- تۇلىكتىڭ قورى نەمەسە جەتىسپەۋشىلىنى تۋرالى اقپاراتتاندىرۋ بولىگىندە ءوزارا ءىس- قيمىل جاساۋعا شاقىرادى»، - دەلىنگەن ق ر ا ش م حابارلاماسىندا.