پاۆلودار وبلىسىندا جەدەل ارەكەت ەتۋ ورتالىعى قۇرىلدى

جەدەل ارەكەت ەتۋ ورتالىعىنا (ج ا ە و) 130 ءنومىرى بويىنشا قوڭىراۋ شالۋعا بولادى، ۋاقىتشا بۇل نومىرگە تەك ستاتسيونارلى تەلەفون ارقىلى حابارلاسۋعا مۇمكىندىك بار. سونىمەن قاتار، ۇيالى تەلەفوننان 109 ءبىرىڭعاي بايلانىس ورتالىعىنا تۇسكەن وتىنىشتەر جەدەل ارەكەت ورتالىعىنا جىبەرىلەدى.

جا ە و ايماقتا كارانتين رەجيمىنىڭ ەنگىزىلۋىنە بايلانىستى تۇرعىنداردىڭ سۇراقتارىنا جەدەل جاۋاپ بەرۋ ماقساتىندا قۇرىلدى.

پاۆلودار وبلىسى اكىمىنىڭ ورىنباسارى ساكەن شاياحمەتوۆتىڭ ايتۋىنشا، جەدەل ارەكەت ەتۋ ورتالىعىنا تۇسكەن سۇراقتارعا ءبىر ساعات ىشىندە جاۋاپ بەرىلەدى.

- ج ا ە و - دا بارلىق وبلىستىق باسقارما باسشىلارىنىڭ ورىنباسارلارىنان قۇرىلعان 80 نەن استام قىزمەتكەر شوعىرلانعان، - دەپ حابارلادى وبلىس اكىمىنىڭ ورىنباسارى جۋرناليستەرمەن وتكىزگەن تىكەلەي كونفەرەنتسيا بارىسىندا.

- ءبىز كاسىپكەرلىك، اۋىل شارۋاشىلىعى، تۇرعىن ءۇي-كوممۋنالدىق شارۋاشىلىعى، الەۋمەتتىك قورعاۋ سياقتى باستى باعىتتار بويىنشا جۇمىس جاسايمىز. قازىر بارلىق وتىنىمدەر 109 ءبىرىڭعاي بايلانىس ورتالىعى ارقىلى قابىلدانىپ جاتىر، وندا وپەراتورلار سانىن كوبەيتتىك. ەگەر دە شەشىمى قيىن سۇراقتار بولسا، ولار تەز ارادا جەدەل ارەكەت ەتۋ ورتالىعىنا جىبەرىلەدى. قازىرگى ۋاقىتتا 130 نومىرىنە تەك ستانتسيونارلى تەلەفون ارقىلى قوڭىراۋ شالۋعا بولادى، ءبىراق جۋىق ارادا ۇيالى تەلەفونمەن حابارلاسۋعا دا مۇمكىندىك جاسالادى.

ج ا ە و تۇرعىنداردى تولعاندىرعان باستى سۇراقتاردى شەشۋ ءۇشىن تاۋلىك بويى جۇمىس ىستەيدى.