مەركى اۋداندىق اۋرۋحاناسىنىڭ باس دارىگەرى مەن ونىڭ ورىنباسارى جۇمىستان بوساتىلدى

None
None
تاراز. قازاقپارات - جامبىل وبلىسى مەركى اۋدانىنداعى دارىگەر- ينفەكسيونيستىڭ شاعىمى بويىنشا تەكسەرۋ قورىتىندىسىنا سايكەس اۋرۋحانا باسشىلارى جۇمىستان بوساتىلدى، دەپ حابارلايدى قازاقپارات وبلىس اكىمدىگىگىنىڭ رەسمي سايتىنا سىلتەمە جاساپ.

جامبىل وبلىسى اكىمىنىڭ ورىنباسارى ەرجان جىلقىبايەۆ مەركى اۋداندىق اۋرۋحاناسىنىڭ مەديتسينا قىزمەتكەرلەرىمەن جانە اۋدان تۇرعىندارىمەن كەزدەستى. كەزدەسۋ بارىسىندا مەديتسينالىق مەكەمە قىزمەتكەرلەرىنىڭ شاعىمدارى بويىنشا جۇرگىزىلگەن تەكسەرۋدىڭ قورىتىندىسى ايتىلدى.


ەستەرىڭىزگە سالا كەتەيىك، وبلىس اكىمىنىڭ تاپسىرماسى بويىنشا قۇرىلعان ارنايى كوميسسيانىڭ قۇرامىنا تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ، پروكۋراتۋرا ورگاندارىنىڭ، وبلىس اكىمى اپپاراتىنىڭ قىزمەتكەرلەرى، قوعام جانە كاسىپوداق ۇيىمدارىنىڭ وكىلدەرى كىردى.

«كوميسسيا اۋداندىق اۋرۋحانا جۇمىسىنىڭ، ونىڭ ىشىندە دارىگەرلەر ت. وردابايەۆا مەن ق. تورەقۇلدىڭ وتىنىشتەرىندە كورسەتىلگەن فاكتىلەر بويىنشا تەكسەرۋ شارالارىن جۇرگىزدى. كوپتەگەن مالىمەتتەر راستالدى. ۇجىمدا جاعىمسىز مورالدىق-پسيحولوگيالىق جاعداي قالىپتاسقان دەسەك، وعان ءبىرىنشى كەزەكتە ەمدەۋ مەكەمەسى باسشىلىعىنىڭ ءوز كاسىبي مىندەتتەرىنە جاۋاپسىز قاراعاندىعى سەبەپ بولعان»، - دەدى ە. جىلقىبايەۆ.

جول بەرىلگەن بۇزۋشىلىقتار ءۇشىن اۋرۋحانانىڭ باس دارىگەرىنىڭ مىندەتىن اتقارۋشى د. نۇسىپبايەۆ، باس دارىگەردىڭ ەمدەۋ ءىسى جونىندەگى ورىنباسارى ج. شويبەكوۆا جانە باس ەسەپشى ز. مۇقايەۆا قىزمەتىنەن بوساتىلدى. ەرجان جىلقىبايەۆ تەكسەرۋ ماتەريالدارى ءتيىستى شارالار قابىلداۋ جانە قاراۋ ءۇشىن قۇقىق قورعاۋ ورگاندارىنا تاپسىرىلاتىنىن اتاپ ءوتتى. سونداي-اق، ول جاڭادان تاعايىندالعان اۋرۋحانانىڭ باس دارىگەرى رايقۇل نۇرجانوۆتى تانىستىرىپ، وعان ورىن العان بۇزۋشىلىقتاردى جويۋ جانە ۇجىمداعى مورالدىق-پسيحولوگيالىق احۋالدى قالپىنا كەلتىرۋ بويىنشا ماڭىزدى مىندەتتەر جۇكتەدى. وبلىس اكىمىنىڭ ورىنباسارى ءوز سوزىندە مەديتسينا قىزمەتكەرلەرىنىڭ قۇقىقتارىن قورعاۋ ماسەلەلەرى ەرەكشە باقىلاۋدا ەكەنىن جەتكىزدى.

الداعى ۋاقىتتا دا ولاردى قاجەتتى قورعانىس قۇرالدارىمەن قامتاماسىز ەتۋ، جۇمىستاعى قاۋىپسىزدىك شارالارىن نىعايتۋ جانە ماتەريالدىق قولداۋ ءۇشىن بارلىق مۇمكىندىكتەر جاسالاتىنىن تىلگە تيەك ەتتى. ە. جىلقىبايەۆ دارىگەرلەر ت. وردابايەۆا مەن ق. تورەقۇلدىڭ الداعى ۋاقىتتا قانداي دا ءبىر زاڭسىز ءىس-ارەكەتتەردەن قورقۋىنا نەگىز جوق، ولار وبلىس باسشىلىعىنىڭ تىكەلەي باقىلاۋىندا بولادى دەپ سەندىردى.

سونىمەن قاتار، وبلىس اكىمى دەنساۋلىق ساقتاۋ باسقارماسى باسشىسىنىڭ جانە اۋدان اكىمىنىڭ جەكە جاۋاپكەرشىلىگى تۋرالى ماسەلەنى قاراستىرماق.

ەسكە سالا كەتەيىك، بۇعان دەيىن كوروناۆيرۋس ينفەكسياسىن جۇقتىرىپ العان اتالعان اۋداندىق اۋرۋحانانىڭ ينفەكسيونيست دارىگەرى تولقىناي وردابايەۆا الەۋمەتتىك جەلىدە ءوزى قىزمەت ەتەتىن اۋرۋحاناعا قاتىستى شاعىمىن جەتكىزگەن بولاتىن.

سونداي-اق، جامبىل وبلىسىنىڭ مەركى اۋدانىندا كوروناۆيرۋس جۇقتىرعان دارىگەردىڭ شاعىمى بويىنشا تەكسەرۋ باستالعانىن جازعان بولاتىنبىز.

سونىمەن قاتار، Nur Otan پارتياسىنىڭ تەكسەرۋىنەن سوڭ جامبىل وبلىسىندا اكىمنىڭ ورىنباسارى مەن باس دارىگەر جازالانعان ەدى.


سوڭعى جاڭالىقتار