الماتى باس سانيتارلىق دارىگەرى: سارىمساق، ليمون، ءزىمبىر قانشالىقتى ءتيىمدى

الماتى. قازاقپارات - سارىمساق، ءزىمبىر، ليمون كوروناۆيرۋسقا قارسى قانشالىقتى ءتيىمدى؟ بۇل جايلى الماتى قالالىق تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى ايزات مولداقاسىموۆا ءوز پىكىرىن ءبىلدىردى، دەپ حابارلايدى قازاقپارات ءتىلشىسى.

«ءزىمبىر مەن ليمون دارىلىك زاتقا جاتپايدى. بۇل اعزانىڭ يممۋنيتەتىن كوتەرەتىن، فۋنكسياسىن قالپىنا كەلتىرەتىن تاماققا جاتادى. ءبىراق جۇققان اۋرۋدى ەمدەپ جازعانى تاجىريبەدە دالەلدەنبەگەن»، - دەدى ول.

ونىڭ ايتۋىنشا، بۇل زاتتاردى كوروناۆيرۋستان پروفيلاكتيكالىق ماقساتتا ىشكەن دۇرىس. «ءزىمبىر، سارىمساق، ليمون، ميكروەلەمەنتتەر، دارۋمەندەردى اۋرۋدىڭ الدىن الۋ ماقساتىندا ىشكەن پايدالى. ادامداردىڭ يممۋنيتەتى جاقسى بولسا، دەرت جۇعا بەرمەيدى. سوندىقتان، ادامدار وقشاۋلانىپ، يممۋنيتەتىن كوتەرىپ جۇرسە، وتە جاقسى قورعانىس قۇرالى بولادى. حالىق مەديتسيناسىندا قولدانىلاتىن دارىلىك شوپتەر تەك پروفيلاكتيكالىق ماقساتتا ءىشىلۋى كەرەك. ءبىراق COVID ينفەكسياسىنان ارنايى ۆيرۋسقا قارسى پرەپاراتتار ارقىلى جازىلادى»، - دەدى ول.

مۇنىڭ الدىندا الماتى اكىمىنىڭ ءبىرىنشى ورىنباسارى ەرلان قوجاعاپانوۆ ۆيرۋستان قالاي قورعاناتىنىن ايتقان بولاتىن.

اۆتور: گۇلميرا عوسمانالي