ەكولوگيانىڭ جاقسارعانى سونشالىق، العاش رەت گيمالايدى انىق كورىندى
دجالاندحار قالاسى مەن ونىڭ توڭىرەگىندە تۇراتىن ادامدار الەۋمەتتىك جەلىلەردە تاۋلاردىڭ سۋرەتىن جاريالاپ جاتىر، ولار تاۋ شىڭدارىن ونداعان جىلدار بويى كورە الماعانىن جازعان.
«30 جىلدا العاش رەت گيمالايدى انىق كوردىم، سەبەبى اۋا تازاردى. تاڭعالارلىق جايت»، - دەپ جازدى ماندجيت كانگ.
«گيمالاي تاۋلارىن جالاندحاردان كورۋگە بولادى، ويتكەنى پەندجاباداعى اۋانىڭ لاستانۋ دەڭگەيى تومەندەدى. ادەمى كورىنىس»، - دەپ جازادى TjSingh اتتى جەلى قولدالانۋشىسى.
22-ناۋرىزدان باستاپ ءۇندىستاندا كوروناۆيرۋس پاندەمياسىنا بايلانىستى قاتاڭ كارانتين رەجيمى قابىلداندى. ەلدەگى اۋا ساپاسى وڭىردە ونەركاسىپتىك كاسىپورىنداردىڭ جۇمىسى مەن اۆتوكولىك ءجۇرىسى توقتاعاننان كەيىن جاقساردى.
ءۇندىستاننىڭ ەكولوگيانى باقىلاۋ جونىندەگى ورتالىق كەڭەسى شەكتەۋلەردى ەنگىزگەننەن كەيىن العاشقى كۇنى اۋە كەڭىستىگى 44 پايىزعا تازارعانىن انىقتادى. كارانتيننىڭ ءبىرىنشى اپتاسىندا ەلدىڭ 85 قالاسىندا ەكولوگيالىق جاعداي جاقساردى.
Iqair AirVisual World Quality دەرەكتەرىنە سايكەس، الەمنىڭ ەڭ لاستانعان 30 قالانىڭ ىشىندە 21 قالا ءۇندىستاندا ورنالاسقان. ولاردىڭ التاۋى ءبىرىنشى وندىققا كىرەدى.
بۇعان دەيىن يتاليادا كارانتينگە بايلانىستى اۋانىڭ لاستانۋ دەڭگەيى جاقسى تومەندەگەنى حابارلانعان. وسىنداي وزگەرىستەر قىتاي مەن الماتىدا بايقالدى.
