شىمكەنتتە جول بويىنا شىققان بۇقا ءبىر ادامدى ءسۇزىپ كەتكەن

شىمكەنت. قازاقپارات - شىمكەنت قالاسىندا جول بويىنا شىعىپ كەتكەن بۇقا، كولىگىن جوندەپ جاتقان جۇرگىزۋشىنى سۇزگەن.

قازىر سيىردىڭ يەسى انىقتالىپ، وعان حاتتاما تولتىرىلدى، دەپ حابارلايدى قازاقپارات Polisia.kz-كە سىلتەمە جاساپ.

اباي اۋداندىق پوليتسيا باسقارماسى جەرگىلىكتى پوليتسيا بولىمشەسىنىڭ ۋچاسكەلىك پوليتسيا ينسپەكتورى ەلبۋرس نىشانبايەۆ 15-ناۋرىزدا جيدەلىبايسىن كوشەسىنىڭ بويىندا اۆتوكولىگىن جوندەپ جاتقان جۇرگىزۋشىنى ءسۇزىپ كەتكەن بۇقانىڭ يەسىن انىقتاپ، پوليتسياعا جەتكىزدى. بۇقانى سول كوشەنىڭ 42 جاستاعى تۇرعىنى مال بازارىنان ساتىپ الىپ كەلە جاتقان كەزدە، باۋىنان بوساپ كەتكەنى انىقتالدى.

وسىنداي جاعدايلارعا جول بەرمەۋ بويىنشا بۇقانىڭ يەسىمەن پروفيلاكتيكالىق سۇحبات جۇرگىزىلىپ، وعان قاتىستى ق ر اكىمشىلىك قۇقىق بۇزۋشىلىق تۋرالى كودەكسىنىڭ 408-بابىنىڭ 2-بولىگى (وبلىستاردىڭ، رەسپۋبليكالىق ماڭىزى بار قالالاردىڭ جانە استانانىڭ جەرگىلىكتى وكىلدى ورگاندارى بەلگىلەگەن، جەكە تۇلعالاردىڭ دەنساۋلىعىنا نەمەسە مۇلكىنە زيان كەلتىرۋگە اكەپ سوققان اۋىل شارۋاشىلىعى جانۋارلارىن جايۋ ەرەجەلەرىن بۇزۋ) بويىنشا اكىمشىلىك حاتتاما تولتىرىلدى.