پيكەتتەردى كەز كەلگەن جەردە وتكىزە بەرۋگە رۇقسات بەرىلەدى - مينيستر

None
None
نۇر-سۇلتان. قازاقپارات - ق ر اقپارات جانە قوعامدىق دامۋ ءمينيسترى داۋرەن ابايەۆ ءماجىلىستىڭ ەكىنشى وقىلىمىندا ماقۇلدانعان ەلدەگى بەيبىت جينالىستار تۋرالى زاڭ جوباسىنا قاتىستى تاعى ءبىر رەت پىكىر ءبىلدىردى، دەپ حابارلايدى قازاقپارات ءتىلشىسى.

«مەملەكەت باسشىسىنىڭ تىكەلەي تاپسىرماسىمەن بۇل زاڭ جوباسىن ازىرلەدىك. ءارتۇرلى الاڭدا وتە كوپ تالقىدان وتكىزدىك. كوپتەگەن وزگەرىس ەنگىزىلدى. ساراپشى دەپۋتاتتار عانا ەمەس، قۇقىق قورعاۋ سالاسىنىڭ ماماندارى، ازاماتتىق بەلسەندىلەر دە ءوز وزگەرىستەرىن ەنگىزدى. البەتتە قازىر زاڭ جوباسى ايتارلىقتاي وزگەردى. الايدا وزگەرىستەردىڭ دەڭگەيىن سالىستىرا سالۋدىڭ ەڭ قاراپايىم جولى - زاڭ جوباسىنىڭ بۇرىن جانە بۇگىن قالاي بولعانىن وقي سالۋ عانا»، - دەدى داۋرەن ابايەۆ «اشىق ديالوگ» باعدارلاماسىندا.

مينيستر ءوز ءسوزىن بىرنەشە مىسالمەن شەگەلەي ءتۇستى.

«قازىر ءبىز ۇعىمداردىڭ ءبارىن دە ايقىنداپ الدىق. بەيبىت جيىن، پيكەت، ميتينگ، شەرۋ، دەمونستراتسيا، ۇيىمداستىرۋشى، قاتىسۋشى - ءبارى ايقىندالدى. ءبىز حالىقارالىق قۇقىق قورعاۋ ۇيىمدارىنىڭ ۇسىنىستارىن ورىندادىق»، - دەدى ول.

داۋرەن ابايەۆ بۇرىن ميتينگتەردى تەك اكىمدىكتەردىڭ رۇقساتىمەن وتكىزۋ مۇمكىن بولعانىن ەسكە سالدى.

«قازىر پيكەتتەر مەن جيىندارعا شىعۋ ءۇشىن تەك بيلىككە حابارلاندىرۋ كەرەك. رۇقسات الۋدىڭ قاجەتى جوق. بۇل - پرەزيدەنتتىڭ تاپسىرماسى بولدى. بۇرىن ميتينگ وتكىزىلەتىن جەردى ءماسليحاتتار بەلگىلەيتىن. قازىر ارنايى ورىندار تۇسىنىگى ەنگىزىلۋدە. بۇل رەتتە پرەزيدەنتتىڭ تاپسىرماسىمەن نەگىزگى تالاپ - قالانىڭ سىرتىندا بولماۋى كەرەك. ماسەلەن پيكەتتەردى كەز كەلگەن جەرگە وتكىزە بەرۋگە بولادى. كەلەسى: زاڭنىڭ سيپاتى تۋرالى. نەگىزگى رەتتەۋ بۇرىن ءماسليحاتتاردىڭ قاراۋىندا ەدى. ءبىز تىكەلەي ىقپال ەتۋشى زاڭدى جاسادىق. بۇرىن 10 كۇن بۇرىن ءوتىنىم بەرۋ تالابى بولدى. قازىر - 5 كۇن»، - دەدى ول.

مينيستر وتىنىمدەردى قاراۋ مەحانيزمىنە دە وزگەرىس ەنگىزىلگەنىن، جاڭا زاڭدا تالاپتاردىڭ ناقتى مەرزىمدەرى ناقتىلانعانىن ايتىپ ءوتتى.

«شىنىمدى ايتسام ليبەراليزاتسيالانعان اتالعان زاڭدى تۇككە تۇرعىسىز ەتكىسى كەلەتىن ادامداردىڭ ويلارىن تۇسىنەمىن. ولار دا ەركىندىك ءۇشىن كۇرەسۋشى مارتەبەسىن دە ساقتاپ قالۋ كەرەك. ءبىراق ولار ءبىر ماڭىزدى جايدى تۇسىنبەيدى: كوزگە كورىنىپ تۇرعان، جاقسارعان زاڭ جوباسىن مويىنداماي ولار مەملەكەت پەن قوعامنىڭ ديالوگىنا زيانىن كەلتىرەدى»، - دەپ ءتۇيدى داۋرەن ابايەۆ.


سوڭعى جاڭالىقتار