قازاقستاندىق عالىمدار قولجەتىمدى دەزينفەكتسيالىق قۇرال جاساپ شىعاردى

None
None
نۇر-سۇلتان. قازاقپارات - قازاقستاندىق عالىمدار قولجەتىمدى دەزينفەكتسيالىق قۇرال جاساپ شىعاردى.

بۇل تۋرالى ۇ ع ا پرەزيدەنتى مۇرات جۇرىنوۆتىڭ «ەگەمەن قازاقستان» گازەتىندە جاريالانعان ماقالاسىندا ايتىلعان، دەپ حابارلايدى قازاقپارات.

«...دۇنيەجۇزىلىك دەنساۋلىق ساقتاۋ ۇيىمى (د د ۇ) ا ق ش جانە جاپونيا عالىمدارى ازىرلەگەن ۆيرۋسقا قارسى دەزينفەكتسيالاۋ قۇرالدارىن، انتيۆيرۋستىق سانيتايزەرلەر ۇسىندى. ولار بارلىق ۆيرۋستارمەن قاتار، ءدال COVID-19 ۆيرۋسىن جويۋ ارقىلى وتە ءتيىمدى جۇمىس اتقارادى.

الايدا ولاردىڭ قۇرامىنا كىرەتىن كەيبىر كومپونەنتتەر - حيميالىق زاتتار قازاقستاندا جوق نەمەسە جەتكىزىلۋى قيىن. سوندىقتان ولاردىڭ بيولوگيالىق انتيۆيرۋستىق بەلسەندىلىگىن ساقتاي وتىرىپ، قولجەتىمدى باسقا حيميكاتتارعا اۋىستىرۋ كەرەك بولدى.

بۇل تاپسىرمانى د. سوكولسكي اتىنداعى جانارماي، كاتاليز جانە ەلەكتروحيميا ينستيتۋتىنىڭ عالىمدارى قولعا الدى. ولار ونداعان ءتۇرلى حيمرەاكتيۆتەردى سىناپ، انتيۆيرۋستىق سانيتايزەرلەردىڭ ءارتۇرلى دەزينفەكتسيالىق قۇرامدارىن جاسادى.

ءبىلىم جانە عىلىم ءمينيسترى ا. ايماعامبەتوۆتىڭ قولداۋىمەن ۇلتتىق بيوتەحنولوگيالىق ورتالىقتا (نۇر-سۇلتان ق.)، سونىمەن قاتار ۆيرۋسولوگيا جانە ميكروبيولوگيا ينستيتۋتىندا (الماتى ق.) سىناقتان وتكىزدى. ءبىز كارانتين كۇندەرى ءبىر توپ عالىمدارعا جۇمىس ىستەۋگە رۇقسات ەتكەن الماتى جانە نۇر-سۇلتان قالالارىنىڭ اكىمدىكتەرىنە العىس ايتامىز. سونىڭ ناتيجەسىندە، حيميالىق- بيولوگيالىق زەرتتەۋلەر كورسەتكەندەي، د د ۇ سانيتايزەرلەرىنەن ەشقانداي كەمشىلىگى جوق، اسا ءتيىمدى، سونداي-اق قولجەتىمدى دەزينفەكتسيالىق قۇرالدار جاسالىپ شىقتى...» دەپ جازادى عالىم ماقالاسىندا.

مۇرات جۇرىنوۆتىڭ ايتۋىنشا، سانيتايزەرلەرگە قويىلاتىن باستى تالاپ - ۆيرۋستاردى جەدەل تۇردە جانە تولىق جويۋ.

«...ادامنىڭ يممۋنيتەتى مەن فيزيكالىق كۇيىن كوتەرەتىن بەلگىلى تاسىلدەردىڭ ماڭىزى زور. سونداي-اق قورقىنىش پەن پەسسيميزمنەن دە ارىلۋ كەرەك. قازاقستان جوعارى ءبىلىمدى، عىلىمى مەن مادەنيەتى دامىعان مەملەكەت ەكەنىن ۇمىتپاۋىمىز كەرەك. ال جالپى العاندا، ءبىز ينتەللەكتۋالدىق دەڭگەيدىڭ دامۋى بويىنشا ازيا قۇرلىعىنداعى جاپون، قىتاي، وڭتۇستىك كورەيا ەلدەرىنەن عانا قالىسپىز. باسقا مەملەكەتتەر بىزبەن تەڭ نەمەسە ارتتا. بۇل - ۇلكەن جەتىستىك!» - دەپ تۇيىندەيدى عالىم ماقالاسىن.

سوڭعى جاڭالىقتار