كوروناۆيرۋس: ەلوردالىق دارىگەرلەر قالاي جۇمىس ىستەپ جاتىر

None
None
نۇر- سۇلتان. قازاقپارات - الەمدى الەككە سالعان كوروناۆيرۋس ينفەكسياسى قازاقستاندى دا اينالىپ وتپەدى. اسىرەسە، ءتۇرلى مەملەكەتتەن اۋە رەيستەرىن قابىلداعان باس قالاعا اۋىر جۇك مىندەتتەلدى. نۇر- سۇلتاندىق دارىگەرلەر تاۋلىك بويى جۇمىس ىستەۋگە ءماجبۇر بولدى.

وسى ورايدا، №2 كوپ بەيىندى اۋرۋحانانىڭ باس دارىگەرى يۆان لي قازاقپارات تىلشىسىنە كوروناۆيرۋس ينفەكسياسىمەن كۇرەستىڭ قالاي جۇرگىزىلگەنىن ايتىپ بەردى.

«ەلىمىزگە كوروناۆيرۋس قاۋپى تونگەن سوڭ، دەنساۋلىق ساقتاۋ مينيسترلىگى مەن ەلوردا اكىمدىگى ناقتى باعدارلاما ازىرلەدى. وسى باعدارلاماعا سايكەس، از عانا ۋاقىتتا ەلىمىزدە قاجەتتى توسەك- ورنى بار ءۇش دەڭگەيلى گوسپيتالدەر ازىرلەندى. ءبىرىنشى دەڭگەيلى اۋرۋحاناعا كوروناۆيرۋس ينفەكتسياسىن جۇقتىرعاندار جاتقىزىلدى. وندا ەڭ اۋىر حالدەگى ناۋقاستاردى ەمدەۋ قاجەت بولدى. تۋبەركۋلەزگە قارسى ديسپانسەر بازاسىندا تۇتاس ءبولىم جۇمىس ىستەدى. نەگىزگى جۇكتەمە سولارعا ارتىلدى.

ەكىنشى دەڭگەيدە - اۋرۋ جۇقتىرۋ قاۋپى بار ادامدار ورنالاسىپ، ولاردى ىرىكتەۋ قاجەت بولدى. ياعني، وكپە قابىنۋى نەمەسە كوروناۆيرۋس ينفەكسياسىنا قاتىستى سىرقات ەكەنىن انىقتاۋ كەرەك. ءۇشىنشى دەڭگەيدە - ەلىمىزگە ىندەتتىڭ تاراۋىنا جول بەرمەۋدى ماقسات ەتكەن كارانتيندىك گوسپيتالدەر بولدى. مۇندا شەت ەلدەردەن كەلگەن ازاماتتاردى، تۇتاس اۋە رەيستەرىن كۇتىپ الىپ، تولىق تەكسەرگەن سوڭ عانا وڭىرلەرگە جىبەردىك. وسىلايشا، ەلوردا فيلتر ىسپەتتى جۇمىس ىستەپ، نەگىزگى سوققىعا قارسى تۇردى»، - دەدى يۆان لي.

كارانتيندىك گوسپيتالدەردى ۇيىمداستىرۋ جۇمىسى №2 قالالىق كوپبەيىندى اۋرۋحاناعا جۇكتەلگەن. اۋرۋحانا قىزمەتكەرلەرى 5 دارىگەرلىك- مەيىرگەرلىك بريگاداعا ءبولىنىپ، ۋاقىتشا جاساقتالعان 5 گوسپيتالگە جىبەرىلگەن. «قالا اكىمدىگىنىڭ تىكەلەي قولداۋىمەن «Hilton» ، «كومفورت»، «تۋريست»، «الاۋ»، «Ibis» سىندى ءىرى قوناقۇيلەر پايدالانۋعا بەرىلدى.

قىسقا ۋاقىتتا وسى قوناقۇيلەردە مىڭعا جۋىق توسەك- ورىن ازىرلەدىك جانە 21 - ناۋرىزدان باستاپ، تاۋلىك بويى شەت ەلدەردەن اۋە رەيستەرىن كۇتىپ الدىق. 21 - ناۋرىزدان بۇگىنگە دەيىن 22 رەيس قابىلداپ، 2000 استام ادامعا قىزمەت كورسەتتىك. ءبىز ولاردى تەكسەردىك، گوسپيتالگە ورنالاستىردىق. تەرىس ناتيجە شىققان ادامداردى اۆتوبۋسپەن ۇيلەرىنە دەيىن جەتكىزدىك. ارينە، ا ق ش، يتاليا، يسپانيا، چەحيادان كەلگەندەر بار، ترانزيت ارقىلى بىزگە تۇسكەن ماسكەۋ، مينسك جولاۋشىلارىندا COVID-19 راستالدى. ءبىز ولاردىڭ وزگە وڭىرلەرگە كەتۋىنە جول بەرمەدىك. وسىلايشا، كارانتيندىك گوسپيتالگە قويىلعان مىندەتتى ورىندادىق»، - دەيدى دارىگەر. ونىڭ ايتۋىنشا، شەتەلدىك رەيستەردىڭ باسىم بولىگى تۇنگى ۋاقىتتا كەلەتىن. ءتىپتى ءبىر تۇندە 2-3 رەيس قابىلدانعان. ونىڭ ءارقايسىسىندا 100، 150، 170 جولاۋشىدان بولعان.

«دارىگەرلەر ءبىر تۇندە 300 جولاۋشىنى تەكسەرۋدەن وتكىزەتىن. ياعني، 10-15 مەديتسينالىق مامان زارارسىزداندىرۋ، قورعانىس كيىمىن اۋىستىرۋ، جولاۋشىلاردى تىركەۋ، سىناما الۋ، گوسپيتالگە جاتقىزۋ، بارلىق جاعدايمەن قامتاماسىز ەتۋمەن اينالىستى. بۇل - وتە اۋىر جۇكتەمە. تاڭ الدىندا ماماندارىمىز شارشاپ قۇلايتىن كەزدەر بولدى. ولاردى الماستىرۋ ءۇشىن ءوزىم دە ديرەكتور ەكەنمىن دەپ قاراپ وتىرماي، جولاۋشىلاردى كۇتىپ الىپ، شابادان تاسىدىم. ويتكەنى، ادامدارعا كومەكتەسۋ قاجەت بولدى»، - دەيدى دارىگەر.

اۋرۋحانا جاۋاپكەرشىلىگىنە بەرىلگەن 5 گوسپيتالدە 100-دەن استام قىزمەتكەر جۇمىس ىستەگەن. ولاردىڭ اراسىندا تىنىس الۋ جۇيەسىمەن جۇمىس ىستەيتىن تەراپيەۆت، پۋلمونولوگ، لور- دارىگەرلەر بولدى.

«ءبىزدىڭ قىزمەتكەرلەر بەس بريگاداعا جاساقتالدى. ودان بولەك، جۇرگىزۋشىلەر، IT- ينجەنەرلەر دە جۇمىس ىستەدى. دەرەكتەر بازاسىن اشىپ، ناۋقاستاردى بىردەن تىركەپ وتىردىق. دەزينفەكتورلار توسەك- جابدىقتى تازارتۋ، جويۋمەن اينالىستى. ياعني، تۇتاس مەحانيزم تاۋلىك بويى جۇمىس ىستەپ تۇردى. كارانتيندىك ستاتسيونار رەتىندە ءبىزدىڭ قىزمەتكەرلەر 212500 تەڭگە ۇستەمەاقى الدى. بۇل ۇستەمەاقى دارىگەرلەر مەن مەدبيكەلەرگە عانا قاراستىرىلعان ەدى. ءبىراق، قالا اكىمدىگىنىڭ قولداۋىمەن بۇل تىزىمگە كىرمەگەن قىزمەتكەرلەرىمىز دە وسىنداي ۇستەمەاقى الدى. بۇل ءادىل. ويتكەنى بارلىعى، اۋرۋ وشاعىندا جۇمىس ىستەپ، دەنساۋلىعىن قاتەرگە تىكتى. كىشكەنتاي بالالارى مەن قارت اتا- اناسىن ويلاپ، جۇمىستان باس تارتۋىنا دا بولار ەدى. ءبىراق، ءبىزدىڭ قىزمەتكەرلەردىڭ ەشقايسىسى جۇمىستان قاشپادى. 10-12 تاۋلىك بويى توقتاۋسىز جۇمىس ىستەدى، قوناقۇيدە تۇردى»، - دەدى ي. لي.

جاعدايدىڭ قيىن ەكەنىن ەسكەرە وتىرىپ، اكىمدىك دارىگەرلەر مەن قىزمەتكەرلەردى «دۋمان» قوناقۇيىنە جايعاستىرعان. «قازىر دە دارىگەرلەر سوندا تۇرىپ جاتىر. قوناقۇيلەر دە بارىنشا كومەك كورسەتىپ، ءۇش مەزگىل تاماققا دەيىن قامتاماسىز ەتۋدە. قازىر بىردە- ءبىر قىزمەتكەرىمىزدىڭ اۋرۋ جۇقتىرماعانىن ماقتانىشپەن ايتا الامىز. ويتكەنى، ەپيدەميولوگيالىق باقىلاۋ حاتتاماسى مۇقيات ءتۇسىندىرىلدى. كارانتيندىك نىساندارعا جىبەرىلگەن ماماندارمەن وتە ماڭىزدى ترەنينگ وتكىزدىك. ماشاقاتى كوپ قورعانىس كيىمىن ءبىزدىڭ ماماندار ءبىر جارىم - ەكى مينۋتتا كيەتىن بولدى. بريگاداعا ەڭ تاجىريبەلى، ەڭ وزىق دارىگەرلەر مەن مەيىرگەرلەردى قوستىم. جۇمىس تاجىريبەسى جەتكىلىكتى مامان ءوزىن دە، پاتسيەنتتەردى دە قورعاي الادى. ينفەكتسيانىڭ، مەديتسينالىق وشاقتىڭ نە ەكەنىن تۇسىنبەگەن ادام اعاتتىق جىبەرۋى مۇمكىن. سوندىقتان، اۋرۋ جۇقتىرۋ ءقاۋپى مامانداردىڭ وزىنە تىكەلەي بايلانىستى»، - دەپ اتاپ ءوتتى اۋرۋحانا باسشىسى.

سونداي- اق، اۋرۋحانا ۇجىمى كارانتين كەزىندە كۇشەيتىلگەن رەجيمدە جۇمىس ىستەپ جاتىر. «ازىرگە كارانتيندىك گوسپيتالدەردى جاپپاي، ساقتاپ وتىرمىز. جاعدايدىڭ قالاي ءوربيتىنىن كورۋىمىز كەرەك. ال اۋرۋحانامىزدىڭ جۇمىسى توقتاعان جوق. ادەتتەگىدەي ينسۋلت العان ناۋقاستاردى قابىلداۋ، وتا جاساۋ جۇمىستارى جۇرۋدە. قازىر كۇشەيتىلگەن رەجيمدە جۇمىس ىستەيمىز. سەبەبى، انا مەن بالا ورتالىعى مەن №2 پەريناتالدى ورتالىق كارانتينگە جابىلدى. سايكەسىنشە، ايى- كۇيى جەتكەن ايەلدەر ءبىزدىڭ اكۋشەرلىك بولىمدە بوسانىپ جاتىر. ولارعا كارانتيننىڭ بىتكەنىن كۇت دەپ ايتا المايمىز عوي. بۇعان دەيىن كۇنىنە 30 ايەل بوساندىرىپ كەلسەك، ەندى 70-كە جۋىق ايەل قابىلدايتىن بولدىق. قيىندىققا مويىماي جۇمىسىمىزدى جالعاستىرۋدامىز، سەبەبى بۇل - بىزگە ارتىلعان ۇلكەن جاۋاپكەرشىلىك»، - دەدى يۆان لي.

اۆتور: ايجان سەرىكجان قىز

سوڭعى جاڭالىقتار