كوروناۆيرۋس ققانداي ناۋقاسپەن اۋىراتىن ادامدارعا قاۋىپ ءتوندىرۋى مۇمكىن

None
None
نۇر-سۇلتان. قازاقپارات - كارديولوگيا جانە ىشكى اۋرۋلار عىلىمي- زەرتتەۋ ينستيتۋتى ەندوكرينولوگيا كۋرسىنىڭ جەتەكشىسى، مەديتسينا عىلىمدارىنىڭ كانديداتى لاۋرا دانياروۆا كوروناۆيرۋس ينفەكسياسىنىڭ قانت ديابەتىمەن اۋىراتىندارعا قاۋپى تۋرالى ايتىپ بەردى، دەپ حابارلايدى قازاقپارات.

دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنە سايكەس، COVID-19 جۇقتىرۋ قاۋپى اسىرەسە قانت ديابەتى، گيپەرتونيا، جۇرەك- قانتامىر جۇيەسى مەن سوزىلمالى وكپە اۋرۋلارى جانە قاتەرلى ىسىك اۋرۋلارى بار ەگدە ادامدارعا ءتونۋى مۇمكىن.

«اۋرۋدىڭ دەكومپەنساتسياسى كەزىندە قانت ديابەتى ساناتىنداعى ناۋقاستار اعزاسىنىڭ يممۋنولوگيالىق رەاكتيۆتىلىگى تومەندەۋى مۇمكىن. سوزىلمالى گيپەرگليكەميا (قانداعى قانتتىڭ كوبەيۋى) كەز كەلگەن ينفەكسيالىق اگەنتتەردىڭ، سونىڭ ىشىندە ۆيرۋستىڭ دا ءوسۋى مەن دامۋىنا «قولايلى» قورەكتىك ورتا بولادى. قانت ديابەتىمەن اۋىراتىن ادامداردا ۆيرۋستىق ينفەكسيا قانداعى گليۋكوزا دەڭگەيىنىڭ اۋىتقۋى جانە قانت ديابەتى سالدارىنان اسقىنۋى مۇمكىن. قانت ديابەتىمەن اۋىراتىن ادامدارعا كوروناۆيرۋس ينفەكسياسىن جۇقتىرۋ ءقاۋپىن ازايتۋ ءۇشىن ساقتىق شارالارىن ۇستانۋ قاجەت»، - دەيدى لاۋرا دانياروۆا.

حالىقارالىق قانت ديابەتى فەدەراتسياسى قانت ديابەتىمەن اۋىراتىن ادامداردا كوروناۆيرۋستىڭ الدىن- الۋ بويىنشا ۇسىنىستار جاريالاعان بولاتىن.

ەڭ باستىسى - ءوزىن-ءوزى باقىلاۋ شارالارى: - قانداعى گليۋكوزا دەڭگەيىن باقىلاۋعا ەرەكشە نازار اۋدارۋ كەرەك. تۇراقتى باقىلاۋ قانداعى جوعارى نەمەسە تومەن گليۋكوزا دەڭگەيىنەن تۋىندايتىن اسقىنۋلاردىڭ الدىن الۋعا كومەكتەسەدى. - تۇماۋ بەلگىلەرى بولعان جاعدايدا (دەنەنىڭ قىزۋى، جوتەل، ەنتىگۋ)، مىندەتتى تۇردە دارىگەرگە قارالۋ كەرەك.

- كەز كەلگەن ينفەكسيا قانداعى گليۋكوزا دەڭگەيىن كوتەرەدى جانە سۇيىقتىققا قاجەتتىلىكتى ارتتىرادى، سوندىقتان جەتكىلىكتى مولشەردە سۋ بار ەكەنىنە كوز جەتكىزىڭىز.

- ديابەتكە قارسى ءدارى-دارمەكتەر جەتكىلىكتى بولۋى ءتيىس.

- ەگەر بىرنەشە اپتا بويى وقشاۋلانۋ كەرەك بولسا، قاجەتتى زاتتاردى تۇگەندەڭىز. جالعىز تۇراتىن بولساڭىز، سىزدە قانت ديابەتى بار ەكەنىن بىلەتىن ادامدى ازىرلەڭىز. ويتكەنى اۋىرىپ قالساڭىز، سىزگە كومەك قاجەت بولۋى مۇمكىن.

- دۇرىس تاماقتانۋ مەن فيزيكالىق بەلسەندىلىككە نازار اۋدارۋ كەرەك، سول سەبەپتى، گليكەميالىق يندەكسى تومەن تاعامداردى تاڭداپ، قۋىرىلعان تاعامداردان باس تارتىڭىز.

- قانت، كومىرسۋلار مەن مايلارعا باي تاعامداردى شەكتەپ، مايى از بەلوكتاردى (بالىق، ەت، جۇمىرتقا، ءسۇت، بۇرشاق) تاڭداڭىز؛

- جاسىل جاپىراقتى كوكونىستەردى، جەمىستەردى ەكى نەمەسە ءۇش پورتسيامەن جەۋ كەرەك. حالىقتىڭ بارلىق توپتارىنا كەڭىنەن تاراتىلاتىن كەڭەستەر قانت ديابەتىمەن اۋىراتىندار مەن ولارمەن تىعىز بايلانىستاعى ادامدار ءۇشىن وتە ماڭىزدى، سول سەبەپتى:

- قولىڭىزدى مۇقيات جانە ۇنەمى جۋىڭىز؛

- كەز-كەلگەن زاتتاردى تازارتىپ، زارارسىزداندىرىڭىز؛

- جەكە ىدىس-اياق، كوزىلدىرىك، سۇلگى جانە ت. ب. پايدالانىڭىز؛

- جوتەلگەندە نەمەسە تۇشكىرگەندە اۋىز بەن مۇرىندى مايلىقپەن نەمەسە قولىڭىزبەن جابىڭىز؛

- تىنىس الۋ اۋرۋى، جوتەل جانە تۇماۋ بەلگىلەرى بار كەز- كەلگەن اداممەن بايلانىس جاساماۋعا تىرىسىڭىز.


سوڭعى جاڭالىقتار