الماتىدا كوروناۆيرۋس جۇقتىرعانداردىڭ جالپى جاعدايى قالاي
ونىڭ ايتۋىنشا، بۇگىن الماتىدا كوروناۆيرۋس ينفەكسياسىن جۇقتىرۋدىڭ راستالعان 119-جاعدايى تىركەلدى.
«قازىر جۇقپالى اۋرۋلار ستاتسيونارلارىندا Covid-19-دان 99 پاتسيەنت، ونىڭ ىشىندە ءتورت بالا ەمدەلىپ جاتىر. وسى ۋاقىتقا دەيىن كوروناۆيرۋس ينفەكسياسىن جۇقتىرۋدىڭ ءۇش جاڭا جاعدايى انىقتالدى. 1975 -جىلى تۋعان ەر ادام جانە 1962 جانە 1964 -جىلى تۋعان ەكى ايەل بايلانىستا بولىپ جۇقتىرعان. ەر ادامنىڭ جاي-كۇيى ورتاشا اۋىر دەپ باعالاندى. ونى تەكسەرىپ-قاراۋ كەزىندە پنيەۆمونيا دياگنوزى قويىلدى. ايەلدەردىڭ جاي-كۇيى - قاناعاتتانارلىق، اۋرۋ اعىمىنىڭ جەڭىل ءتۇرى انىقتالدى. ولارمەن بايلانىستا بولعان بارلىق ادامدار كارانتينگىگە ورنالاستىرىلعان»، - دەدى باسقارما باسشىسى ت. ابىلدايەۆ.
ونىڭ ايتۋىنشا، قازىر 80 ناۋقاستىڭ جاي-كۇيى قاناعاتتانارلىق بولسا، 2 ەرەسەك ادامنىڭ جاعدايى وتە اۋىر. ولار جاساندى تىنىس الۋ اپپاراتىنا قوسىلعان. 13 ەرەسەك ادامنىڭ جاي-كۇيى ورتا اۋىرلىق دەڭگەيىندە، ونىڭ ىشىندە وبلىس تۇرعىنى بار.
اۆتور: گۇلميرا عوسمانالي