مينيستر وقۋشىلارعا بەرگەن تاپسىرمانى ورىنداۋعا ۋاقىت بەرۋ قاجەتتىگىن ايتتى
«ەلىمىزدە 500 مىڭعا جۋىق مۇعالىم بولعاننان كەيىن ءارتۇرلى ماسەلە بولىپ تۇرادى. مىسالى، ءبىزدىڭ كەيبىر ارىپتەستەرىمىز بۇگىن بەرگەن تاپسىرمالاردى ءبىر ساعات ىشىندە ورىنداپ، كەرى بايلانىس جاساۋ كەرەكتىگى تۋرالى تاپسىرما بەرگەن ەكەن. وسىنداي جاعدايلاردى دا ەستىپ جاتىرمىز. بۇل نارسەنى ءبىز قولدامايمىز، سەبەبى دۇرىس ەمەس. بالالارعا بەرگەن تاپسىرمانى ورىنداۋعا ۋاقىت بەرۋىمىز كەرەك. ول تاپسىرمانى جاقسىلاپ ءتۇسىنىپ، جاقسىلاپ وقىپ بارىپ كەرى بايلانىس ورناتۋ قاجەت. اسىعاتىن ەشتەڭە جوق. بۇل ماسەلەگە ارىپتەستەرىمىزدىڭ نازارىن تاعى ءبىر اۋدارعىم كەلەدى»، - دەيدى مينيستر.
ول ەشقانداي ەسەپ قاجەت ەمەس ەكەنىن ايتتى. «ءبىز ءتيىستى بۇيرىقتى قابىلدادىق. بۇيرىق بويىنشا ءبىلىم بولىمدەرىنەن دە، ءبىلىم باسقارمالارىنان دا، مەكتەپتەردەن دە، مۇعالىمدەردەن دە ەشقانداي ەسەپ تالاپ ەتىلمەۋى كەرەك. بارلىق اقپاراتتى ءوزىمىز ينتەرنەت جۇيەسىنەن ءوزىمىز الىپ وتىرامىز. مۇعالىمدەردەن، اتا- انالاردان ەسەپ تالاپ ەتۋدى توقتاتۋ بويىنشا ءىس- شارا قولداندىق. ءار مۇعالىم، مەكتەپ باسشىسى قالاي جۇمىس ىستەۋ كەرەك ەكەنىن جاقسى بىلەدى، سوندىقتان ەسەپ تالاپ ەتىلمەيدى، ەشقانداي تەكسەرىس جۇرگىزىلمەيدى»، - دەيدى اسحات ايماعامبەتوۆ.
اۆتور: زارينا قاھارمان
