مامىر ايىنان باستاپ تەڭگەدەگى دەپوزيتتەر بويىنشا ەڭ جوعارى پايىزدىق ستاۆكا وزگەرەدى
وسىعان بايلانىستى قازاقستان ۇلتتىق بانكىنىڭ 6- ساۋىردەن باستاپ بازالىق مولشەرلەمەنى 12 پايىزدان 9,5 پايىزعا دەيىن تومەندەتۋ تۋرالى كەزەكتەن تىس شەشىمىنەن سوڭ قازاقستاننىڭ دەپوزيتتەرگە كەپىلدىك بەرۋ قورى مەرزىمسىز جانە قىسقا مەرزىمدى دەپوزيتتەر بويىنشا ەڭ جوعارى سىياقى مولشەرلەمەسىن تومەندەتتى.
بۇل 2020-جىلدىڭ 1- مامىرىنان باستاپ قولدانىسقا ەنگىزىلەدى. ق د ك ب ق ادىستەمەسىنە سايكەس بازالىق مولشەرلەمەنىڭ وزگەرۋى تەك مامىر ايىنا ارنالعان ەڭ جوعارى مولشەرلەمەگە عانا اسەر ەتتى. ال ءساۋىر ايىنىڭ ستاۆكاسى وزگەرگەن جوق.
«بۇل رەتتە قىسقا مەرزىمدى سالىمدار تابىستىلىعىنىڭ كۇرت تومەندەۋىنە جول بەرمەس ءۇشىن جانە جاقىن كەلەشەكتە دەپوزيتتەردىڭ وسى توبى بويىنشا مولشەرلەمەلەر بىرتىندەپ تومەندەيتىندىكتەن، قور تومەندەتىلگەن بازالىق مولشەرلەمەگە قاتىستى سپرەدتى كوتەردى. بۇعان دەيىنگى ەڭ جوعارى مولشەرلەمەلەر ناۋرىز بەن ساۋىردە بازالىق مولشەرلەمەنىڭ وسكەندىگىن ەسكەرە وتىرىپ بەكىتىلگەن بولاتىن. ەڭ جوعارى مولشەرلەمەلەردى وزگەرتۋ الەمدىك جانە ىشكى نارىقتا قالىپتاسقان جاعدايعا بايلانىستى سالىمشىلاردىڭ مۇددەسىن قورعاۋ ءۇشىن دەر كەزىندە قابىلدانعان شارا بولدى»، دەلىنگەن حابارلامادا.
سونىمەن تەڭگەدەگى مەرزىمسىز سالىمدار بويىنشا ەڭ جوعارى سىياقى مولشەرلەمەسى - 12 پايىز.
تولىقتىرۋعا بولاتىن، 3 جانە 6 ايلىق مەرزىمدى سالىمدار بويىنشا مولشەرلەمەلەر - 12 پايىزدى، ال تولىقتىرىلمايتىن ءتۇرى بويىنشا - 12,5 پايىزدى قۇرادى. وسى مەرزىمدەرگە ارنالعان، تولىقتىرىلاتىن جيناق دەپوزيتتەر بويىنشا مولشەرلەمەلەر - 13 پايىز، ال تولىقتىرىلىمايتىن ءتۇرى بويىنشا - 13,5 پايىز.
جاڭارتىلعان مولشەرلەمەلەر سالىمداردى سارالاۋ، ياعني جىكتەۋ قاعيداسىنا تولىعىمەن جاۋاپ بەرەدى - تولىقتىرۋعا بولاتىن، قىسقا مەرزىمگە ارنالعان دەپوزيتتەر بويىنشا مولشەرلەمەلەر وسى سالىمداردىڭ تولىقتىرىلمايتىن ءتۇرى بويىنشا مولشەرلەمەلەردەن 0,5 پايىزدىق تارماققا تومەن.
تولىقتىرىلمايتىن جيناق دەپوزيتتەردى قوسپاعاندا ۇزاق مەرزىمدى سالىمدار بويىنشا 2020-جىلدىڭ مامىرىنا بەلگىلەنگەن مولشەرلەمەلەر وزگەرگەن جوق. ال تولىقتىرىلمايتىن جيناق دەپوزيتتەردىڭ مولشەرلەمەلەرى - 14,7 جانە 14,8 پايىزعا دەيىن تومەندەتىلدى.
بۇل رەتتە ولار مولشەرلەمەلەرى قايتا قارالعان قىسقا مەرزىمدى دەپوزيتتەرمەن سالىستىرعاندا تارتىمدى بولىپ قالا بەرمەك. ويتكەنى جوعارى تابىستىلىقتى قامتاماسىز ەتەدى.
