شىمكەنتتە كوروناۆيرۋستان قايتىس بولعان ادامعا قاتىستى تىڭ دەرەكتەر ايتىلدى
«شىمكەنت قالاسىندا كوروناۆيرۋس ىندەتىنەن بۇگىن ءبىر ادام كوز جۇمدى. ناۋقاس 1964 -جىلى دۇنيەگە كەلگەن. تۇركىستان وبلىسى ماقتاارال اۋدانىنىڭ تۇرعىنى. ول 3 - ءساۋىر كۇنى شىمكەنت قالاسى جۇقپالى اۋرۋلار اۋرۋحاناسىنا جاتقىزىلعان»، - دەدى ايگۇل بەكباۋوۆا «حابار 24» تەلەارناسىنىڭ تىكەلەي ەفيرىنەن.
انىقتالعانداي، ناۋقاس جۇك كولىگىنىڭ جۇرگىزۋشىسى بولدى. وسى ورايدا «ماسكەۋ - الماتى» باعدارى بويىنشا شىمكەنت قالاسىنا ترانزيتپەن توقتاعان. دەنە قىزۋىنا شاعىمدانۋىنا بايلانىستى جەدەل جاردەم كومەگىمەن ناۋقاس ينفەكسيالىق اۋرۋحاناعا ستاتسيونارعا جاتقىزىلدى. سىرقاتىنا بايلانىستى رەانيماتسيالىق بولىمدەگى اپپاراتقا قوسىلعان.
«ناۋقاستىڭ قانت ديابەتى، قىسىمنىڭ كوتەرىلۋى سەكىلدى قوسالقى اۋرۋلارى بولعان. سونىمەن قاتار ول ءبىر جىل بۇرىن تۋبەركۋلەز اۋرۋىنا شالدىققان. بۇگىن تۇندە ناۋقاس رەانيماتسيالىق بولىمدە قايتىس بولعان. ناۋقاسپەن قارىم- قاتىناستا بولعان ۇلى الماتى قالاسىندا وقشاۋلانىپ، ستاتسيونارعا جاتقىزىلدى»، - دەدى ايگۇل بەكباۋوۆا.
بۇدان بۇرىن حابارلانعانداي، شىمكەنتتە كوروناۆيرۋستان 1964 -جىلى تۋعان 1 ادام قايتىس بولدى.
اۆتور: رۋسلان عابباسوۆ