كوروناۆيرۋس قازاقستان بويىنشا تەك ءبىر وڭىردە عانا جوق

نۇر-سۇلتان. قازاقپارات - «وڭىردەگى ەپيدەميولوگيالىق احۋال تۇراقتى. الايدا، اۋرۋ ايتىپ كەلمەيدى.

سوندىقتان ارقانى كەڭگە سالۋعا بولمايدى. قاۋىپتى دەرتكە قارسى قاۋىپسىزدىك ءىس- شارالارىن كۇشەيتۋ ءۇشىن وبلىستا ءتيىستى قام- قارەكەت جاسالۋدا».

بۇعان دەيىن قوستاناي وبلىسىنىڭ پەريمەترى بويىنشا 10 بلوكبەكەت ورناتىلاتىنىن ايتتىق. ال بۇگىندە ءدۇمپۋى دۇنيەجۇزىن دۇرلىكتىرگەن دەرت ەل بويىنشا جالعىز وسى وڭىردە عانا تىركەلمەگەن. جالپى، بۇگىنگى جاعداي بويىنشا، قازاقستاندا كوروناۆيرۋس ىندەتىن جۇقتىرعان تاعى 6 ادام انىقتالىپ، ناۋقاستاردىڭ جالپى سانى 402 گە جەتتى، دەپ حابارلايدى Skifnews.kz اقپارات پورتالى.

قازىر قازاقستان كارتاسىندا كوروناۆيرۋس دەرتى بويىنشا قوستاناي وبلىسىنىڭ «نولدىك» كورسەتكىش كورسەتىپ تۇرعان نۇسقاسى الەۋمەتتىك جەلىلەردە كەڭ تاراۋدا.

«وڭىردەگى ەپيدەميولوگيالىق احۋال تۇراقتى. الايدا، اۋرۋ ايتىپ كەلمەيدى. سوندىقتان ارقانى كەڭگە سالۋعا بولمايدى. قاۋىپتى دەرتكە قارسى قاۋىپسىزدىك ءىس- شارالارىن كۇشەيتۋ ءۇشىن وبلىستا ءتيىستى قام- قارەكەت جاسالۋدا. اتى جامان دەرتتىڭ الدىن الۋ ماقساتىندا مەديتسينا وكىلدەرى مەيلىنشە مۇقياتتىلىق تانىتىپ وتىر»، - دەيدى وبلىستىق دەنساۋلىق ساقتاۋ باسقارماسىنىڭ باسشىسى ۆياچەسلاۆ دۋدنيك.

ال تاۋارلار جانە كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسپا ءسوز قىزمەتى 18-ناۋرىزدا قوستاناي وبلىسىنا يسپانيا مەن گەرمانيادان كەلگەن 20 ادامنىڭ «ا» ساناتى بويىنشا اۋرۋحاناعا جاتقىزىلعانىن مالىمدەگەن بولاتىن. ولاردىڭ بارلىعى دا قازاقستان ازاماتتارى. جاعدايلارى تۇراقتى. كورونوۆيرۋس ىندەتىن جۇقتىرعاندار جوق.

ءبىر عانا ءوڭىرىمىزدىڭ دەرتتەن اماندىعىن كورەالماعانداي، تاياۋدا وسى وبلىسقا قاراستى ارقالىق قالاسىندا كوروناۆيرۋس انىقتالىپ، بازار جابىلىپ جاتىر دەگەن قاۋەسەت شىقتى. قازىر پوليتسەيلەر الەۋمەتتىك جەلى ارقىلى سول جالعان اقپاراتتى تاراتقان ايەلدى ىزدەستىرىپ جاتىر.