ەلوردادا سۋ تاسقىنىنا قارسى اۋقىمدى ءىس-شارا جۇرگىزىلىپ جاتىر

نۇر-سۇلتان. قازاقپارات - ەلوردادا سۋ تاسقىنىنا قارسى ساقتىق شارالارى جۇرگىزىلىپ جاتىر.

وزەن ارناسىن قايتا جاڭارتۋ، سۋ رەتتەگىش بوگەت سالۋ، ارىقتاردى، نوسەر سۋىنا ارنالعان جۇيەلەردى تازارتۋ جۇمىستارى قولعا الىنعان، دەپ حابارلايدى قازاقپارات اكىمدىككە سىلتەمە جاساپ.

ەلوردا اكىمى التاي كولگىنوۆ سۋ رەتتەگىش بوگەت سالۋ، وزەن ارناسىن كەڭەيتۋ، ءۇيىندى بوگەت سالۋ، دامبانى بيىكتەتۋ جۇمىستارىنىڭ بارىسىن تەكسەردى.

«سۋ رەتتەگىشكە كۇردەلى جوندەۋ جۇرگىزۋ قاجەت. ەكولوگيا مينيسترلىگىمەن بىرلەسىپ ءتيىستى ءوتىنىم جىبەرىلدى. بۇل رەتتەگىشتىڭ وتكىزۋ قابىلەتىن ارتتىرۋعا مۇمكىندىك بەرەدى. بۇگىندە قالانى جانە شەتكەرى ايماقتاردى سۋ تاسقىنىنان قورعايتىن سۋ رەتتەگىشتىڭ جۇمىس ءتارتىبى بەكىتىلدى. مايبالىق كولىنىڭ ارناسىن قاردان تازارتىپ جاتىرمىز. ۇزىندىعى — 5,5 شاقىرىم. مايبالىق كولىنەن «نۇرا-ەسىل» كانالىنا دەيىنگى ارنانىڭ وتكىزۋ قابىلەتىن ارتتىرامىز. بۇل شارالاردىڭ بارلىعى وزەن سۋىنىڭ كەدەرگىسىز ءوتۋىن قامتاماسىز ەتۋگە جانە سۋ باسۋ قاۋپىن ازايتۋعا مۇمكىندىك بەرەدى»، - دەدى قالا اكىمى التاي كولگىنوۆ.

ەلوردا اكىمى التاي كولگىنوۆ ەلدى مەكەندەرگە ەرەكشە كوڭىل بولىنەتىنىن اتاپ ءوتتى. يلينكا كەنتىندەگى دامبانى بيىكتەتىلگەن، ءوندىرىس كەنتىندەگى وزەن ارناسىن قايتا جاڭارتۋ جۇرگىزىلىپ جاتىر. كوكتال-1 ەلدى مەكەنىندە توپىراقتان ۋاقىتشا ۇيمە جال تۇرعىزىلدى. وزەن ارناسىن قالپىنا كەلتىرۋ كەلەسى جىلدارى سۋدى كەدەرگىسىز وتكىزۋگە مۇمكىندىك بەرەدى.

بۇگىنگى تاڭدا قالا اۋماعىنان 6 ميلليون 385 مىڭ تەكشە مەتر قار شىعارىلدى. وتكەن جىلمەن سالىستىرساق، بىلتىر ءۇش جارىم ەسە از قار شىعارىلدى. قىستا قار نورماسى 99 م م، ياعني ەكى ەسە ارتىق ءتۇستى.