تارازدىق ەرىكتىلەر پوليتسەيلەرگە رەيد جۇرگىزۋگە كومەكتەسۋدە

جامبىل وبلىسىندا ەرىكتىلەر، ۇكىمەتتىك ەمەس ۇيىمدار مەن قوعامدىق بىرلەستىكتەردىڭ وكىلدەرى «قوعامدىق ساقشى» جوباسى اياسىندا پوليتسيا قىزمەتكەرلەرىمەن بىرلەسىپ، تاراز قالاسىنداعى ويىن-ساۋىق جانە كوڭىل كوتەرۋ نىساندارى بويىنشا تۇنگى رەيدتەر وتكىزدى. بۇعان دەيىن بارلىق كاسىپكەرلەر توتەنشە جاعداي كەزىندە ساعات 22.00-دە بارلىق مەيرامحانالار مەن ءدامحانالاردىڭ جابىلۋى كەرەكتىگى تۋرالى حابارلاما العان بولاتىن. تۇنگى رەيد كەزىندە ەرىكتىلەر 20 دان استام كوڭىل كوتەرەتىن نىسانداردى، تۇنگى جانە كومپيۋتەرلىك كلۋبتاردى، ينتەرنەت-كافەلەردى ارالادى. بارلىق ويىن-ساۋىق ورىندارى جابىلعان. تالاپ بۇزۋ جاعدايلارى انىقتالعان جوق.

سونىمەن قاتار، موبيلدى توپتار تۇرعىن ۇيلەردىڭ اۋلالارىن ارالاپ، قالا تۇرعىندارىنا اقپاراتتىق پاراقشالار تاراتتى. كوروناۆيرۋس پاندەمياسىنا بايلانىستى الدىن الۋ شارالارىنىڭ تالاپتارىن ءتۇسىندىردى، ازاماتتاردى سەبەپسىز كوشەگە شىقپاۋعا، اينالاسىنداعىلارمەن بايلانىستى بارىنشا قىسقارتۋعا جانە گيگيەنا تالاپتارىن ساقتاۋعا شاقىردى.

اۆتور: قاجى مۇرات