الماتىدا تاعى ءبىرقاتار ءۇي كارانتينگە جابىلدى

بۇل اقپاراتتى قالا اكىمىنىڭ ورىنباسارى ەرجان باباقۇماروۆ راستادى، دەپ حابارلايدى قازاقپارات ءتىلشىسى.

«سۇڭقار» تۇرعىن ءۇي كەشەنىنەن بولەك، دوستىق كوشەسى، 42- ءۇي، دوستىق، 42ا، قابانباي باتىر، 68 مەكەنجايىنداعى ۇيلەر كارانتينگە جابىلدى. اۋلا قورشالدى. ءتورت باقىلاۋ- وتكىزۋ پۋنكتى قويىلدى. ءبىر عانا D&D Market ساۋدا ورنى جۇمىس جاساپ تۇر»، - دەلىنگەن قالا تۇرعىندارىنان ب ا ق وكىلدەرىنە جىبەرىلگەن اقپاراتتا.

WhatsApp جەلىسىندەگى ونلاين- چاتتا تىلشىلەرگە بۇل مالىمەتتى قالا اكىمىنىڭ ورىنباسارى ەرجان باباقۇماروۆ راستادى.

ايتا كەتەيىك، مۇنىڭ الدىندا قالا اكىمدىگى كوروناۆيرۋس وشاقتارى انىقتالعانى تۋرالى اقپاراتتى جوققا شىعارعان بولاتىن. وندا ىندەت انىقتالعان جانە تاراپ جاتقان ناقتى مەكەنجايلار مەن شاعىن اۋداندار كورسەتىلگەن ەدى.

ەسكە سالساق، كەشە تۇندە الماتىداعى «سۇڭقار» تۇرعىن ءۇي كەشەنى ناۋقاس تۇرعىننىڭ انىقتالۋىنا بايلانىستى كارانتينگە جابىلدى. تۇرعىن ءۇي كەشەنىنەن شىعىپ- كىرۋگە رۇقسات جوق. تەك 1 عانا ازىق- تۇلىك دۇكەنى جۇمىس ىستەيتىن بولادى.

اۆتور: گۇلميرا عوسمانالي