برازيليا تۇرمەسىندە وتىرعان قازاقستاندىق ايەل ەلگە قايتارىلۋى مۇمكىن

«سىزدەرگە قازاقستان مەن برازيليا اراسىنداعى: قىلمىستىق ىستەر بويىنشا قۇقىقتىق كومەك، قىلمىسكەرلەردى ەكستراديتسيالاۋ، سوتتالعان ادامداردى بەرۋ تۋرالى ءۇش شارتتى راتيفيكاتسيالاۋ ماقساتىندا كەلىپ وتىرمىز. برازيليامەن وسىنداي شارتتار جاساۋ ماڭىزدى. ايتا كەتەيىن، برازيليا ءبىزدىڭ تاۋەلسىزدىگىمىزدى الدىمەن تانىعان ەلدەردىڭ ءبىرى. جەر شالعاي بولعانىمەن ءوزارا بايلانىس تىعىز. ۋاقىت وتكەن سايىن قارىم- قاتىناس دامىپ كەلەدى. 2016 -جىلدان بەرى ەكى ەل اراسىندا ۆيزاسىز رەجىم ورناعان. سوڭعى جىلدارى تۋريستەر سانى كوبەيىپ كەلەدى»، - دەدى باس پروكۋروردىڭ ورىنباسارى مارات احمەتجانوۆ.

ونىڭ سوزىنە قاراعاندا، بىلتىر ەلىمىزگە برازيليادان 1 مىڭنان استام ادام كەلگەن. قازاقستاننان دا ول ەلگە تۋريستەر مەن بيزنەسمەندەر بارادى.

«دەگەنمەن، اراسىندا ميگراتسيالىق زاڭدى بۇزاتىندار، ءتىپتى قىلمىس جاساعان فاكتىلەر بار. قازىر قازاقستاندىق ءبىر ايەل سوندا تۇرمەدە وتىر»، - دەدى باس پروكۋروردىڭ ورىنباسارى. اتالعان شارتتارعا 2018 -جىلى قازاقستاندا قول قويىلدى.

«ءبىرىنشى، قىلمىستىق ىستەر بويىنشا قۇقىقتىق كومەك تۋرالى شارتقا توقتالايىق. ول شارت كۇدىكتى ادامنىڭ كىناسىن دالەلدەۋ ءۇشىن قاجەتتى تەرگەۋ امالدارىن جۇرگىزۋدى كوزدەيدى. مىسالى، تەرگەۋ امالدارىن جۇرگىزۋ، كۋا رەتىندە ايعاق الۋ، سۇراۋ سالعان جاعدايدا ساراپتاما جاساۋ، اكتيۆتەردى قايتارۋ جانە باسقالارى. شارت بويىنشا ەكى ەلدىڭ تەرگەۋ ورگاندارى ءوزارا كەلىسىپ، ءبىر-بىرىنە باسقا دا كومەك بەرە الادى»، - دەپ ءتۇسىندىردى م. احمەتجانوۆ.

ال، ەكىنشى شارت ۇستاپ بەرۋ تۋرالى قادامدارىنا ارنالعان. قۇجات ىزدەۋدە جۇرگەن ادامداردى قىلمىستىق جاۋاپقا تارتۋ مەن سوت ۇكىمىن ورىنداۋ ءۇشىن ەكستراديتسيالاۋ ماسەلەسىن رەتتەيدى. شارتتا ۇستاپ بەرۋدىڭ جانە ودان باس تارتۋدىڭ ناقتى نەگىزدەرى بەكىتىلگەن.

«سوتتالعان ادامداردى بەرۋ تۋرالى شارت ولارعا جازاسىن ەلىندە وتەۋگە مۇمكىندىك جاسايدى. كونستيتۋتسيانىڭ 11-بابى بويىنشا مەملەكەت وزىنەن تىس جەردە جۇرگەن ازاماتتارىن قورعاۋعا جانە ولارعا قامقورلىق جاساۋعا كەپىلدىك بەرەدى. ياعني، ءبىزدىڭ ازاماتىمىز شەتەلدە قىلمىس جاساسا، ولاردى قورعاۋعا ءتيىسپىز»، - دەدى ول.

بەلگىلى بولعانداي، سوتتالعاندار سانى بويىنشا برازيليا 23-، ال، قازاقستان 99-ورىندا. برازيليادا جازاسىن جاتقان قازاقستاندىق ايەل ەلىمىزگە اۋىسۋ تۋرالى ءوتىنىش بەردى. قازىر بۇل ءوتىنىش قارالىپ جاتىر. وسى شارتتى راتيفيكاتسيالاعان سوڭ بۇل ماسەلە شەشىمىن تابادى.

«حالىقارالىق شارتتار تۋرالى» زاڭعا سايكەس بۇل شارتتار راتيفيكاتسيالاۋعا جاتادى. سەبەبى ازاماتتاردىڭ قۇقىقتارى مەن بوستاندىقتارىنا تىكەلەي قاتىستى. شارتتاردى راتيفيكاتسيالاۋ تەرىس الەۋمەتتىك، ەكونوميكالىق جانە ساياسي سالدارعا اكەلمەيدى. رەسپۋبليكالىق بيۋدجەتتەن قوسىمشا قاراجات تالاپ ەتپەيدى»، - دەدى مارات احمەتجانوۆ.

سەناتتىڭ جالپى وتىرىسىندا «قازاقستان مەن برازيليا اراسىنداعى قىلمىستىق ىستەر بويىنشا ءوزارا قۇقىقتىق كومەك تۋرالى شارتتى راتيفيكاتسيالاۋ تۋرالى» زاڭى، «قازاقستان مەن برازيليا اراسىنداعى ادامداردى ۇستاپ بەرۋ تۋرالى شارتتى راتيفيكاتسيالاۋ تۋرالى» زاڭى، «قازاقستان مەن برازيليا اراسىنداعى سوتتالعان ادامداردى بەرۋ تۋرالى شارتتى راتيفيكاتسيالاۋ تۋرالى» زاڭى قابىلداندى.

اۆتور: رۋسلان عابباسوۆ