ەلوردادا قوعامدىق كولىكتەردىڭ ءجۇرۋ ۋاقىتى قىسقارادى

«قازىرگى ۋاقىتتا ەلوردادا جولاۋشىلار اعىنىنىڭ تومەندەگەنى بايقالادى. نۇر- سۇلتان قالاسىنىڭ اكىمى التاي كولگىنوۆ اتاپ وتكەندەي كەشە جولاۋشىلاردىڭ ازايۋ دەڭگەيى 30 پايىز بولسا، بۇگىن تاعى 10 پايىزعا تومەندەپ كەتتى. وسىلايشا بارلىق باعدار بويىنشا جولاۋشىلار اعىنىنىڭ 40 پايىزعا ازايعانى بايقالادى»، - دەدى بەكمىرزا يگەمبەردينوۆ و ك ق- دا وتكەن باسپا ءسوز ءماسليحاتىندا.

CTS كومپانياسىنىڭ باسشىسى ەلوردادا كارانتيننىڭ ەنگىزىلۋىنە بايلانىستى ەرتەڭنەن باستاپ قوعامدىق كولىكتەردىڭ جۇمىسىنا وزگەرىس ەنگىزىلەتىنىن ايتىپ ءوتتى.

«اتاپ ايتقاندا اۆتوبۋستاردىڭ سانى قىسقارتىلادى. بۇگىنگى كۇنى نۇر- سۇلتانداعى جولعا شىعاتىن اۆتوبۋستاردىڭ سانى 856 بولسا، ولار 676-عا دەيىن ازايادى. بارلىق باعىت- باعدار بويىنشا قىسقارۋ دەڭگەيى 21 پايىزدى قۇرايدى. قالالىق جانە ەكسپرەس باعدارلارداعى اۆتوبۋستاردىڭ سانى 20 پايىزعا، قالا ماڭىنا قاتىنايتىن اۆتوبۋستاردىڭ سانى 32 پايىزعا قىسقارادى. سونىمەن قاتار، اۆتوبۋستاردىڭ ءجۇرۋ ۋاقىتىنا وزگەرىس ەنەدى. ەرتەڭنەن باستاپ ەكسپرەس باعدارلار مەن قالا ماڭىنا قاتىنايتىن اۆتوبۋستار 21.00-گە دەيىن عانا جۇرەتىن بولادى»، - دەدى ول.

اۆتور: ايان بەكەن ۇلى