قازاقستاندا ماسكا شىعاراتىن زاۋىتتار باقىلاۋعا الىنادى - ەلجان ءبىرتانوۆ

بۇل تۋرالى ق ر دەنساۋلىق ساقتاۋ ءمينيسترى ەلجان ءبىرتانوۆ «ەۋرازيا ءبىرىنشى» ارناسىندا ايتتى، دەپ حابارلايدى قازاقپارات ءتىلشىسى.

«ماسكاعا قاتىستى ايتار بولسام، بىزدە ينفەكسيا بولماعان كەزدە ونى تاعىپ ءجۇرۋ قاجەتتىلىگى جوق ەدى. ماسكالاردى ساتىپ الىپ قويۋ قاجەتتىگىن كوپ ايتتىق. وكىنىشكە وراي، ماسكالاردى جاپپاي ساتىپ الىپ، ساتىلىمعا شىعارعانىن كورىپ وتىرمىز. قازىر قويمالاردا جاتقان ماسكالاردى تاۋىپ جاتىرمىز. شەتەلگە شىعارىلماق بولعان، ءبىراق ءبىز تىيىم سالعاننان كەيىن بىرۋلەر تاستاپ كەتكەن ماسكالار دا تابىلدى. بۇگىندە ماسكامەن پروبلەما بار ەكەندىگىن مويىندايمىز. قازىر جۇمىسقا، ۇجىمنىڭ ورتاسىنا باراتىن كەزدە مەديتسينالىق بەتپەردە قاجەت. ال ادام ۇيدە كارانتيندە وتىرسا وعان ماسكانىڭ ەش قاجەتى جوق»، - دەدى مينيستر.

وسى رەتتە ول ماسكا تاپشىلىعىن جويۋ ءۇشىن قانداي جۇمىس اتقارىلىپ جاتقانىن ايتتى. «وسى ۋاقىتتىڭ ىشىندە ماسكا ءوندىرىسىن ەكى ەسەگە جۋىق ۇلعايتتىق. بۇرىندارى 200-300 مىڭ شىعارىلادى دەسەك، قازىر 500 مىڭعا جۋىقتاپ قالدىق. ءبىرقاتار وڭىردە تىگىن سەحىن ىسكە قوستىق. ءبىراق، ماسكانى قاجەتتىلىك بولسا، ماسەلەن قالاعا شىققان كەزدە ساتىپ الىپ تاققان ءجون. تاۋلىك بويى ونىڭ تاعىپ ءجۇرۋدىڭ ەش قاجەتتىلىگى جوق. ودان دا قول تازالىعىن ساقتاعان بارىنشا ماڭىزدى. قازىرگى ۋاقىتتا كارانتيندەگى قالالاردى ماسكامەن قامتاماسىز ەتۋ ءۇشىن بارلىق شارانى قابىلداپ جاتىرمىز»، - دەدى ەلجان ءبىرتانوۆ.

سونىمەن قاتار مينيستر كوروناۆيرۋس كۇدىگىنە ىلىككەن ادامداردى قاراۋمەن، تاسىمالداۋمەن اينالىساتىن جەدەل جەردەم قىزمەتكەرلەرىن، پوليتسيا قىزمەتكەرلەرىن تەگىن ماسكامەن قامتاماسىز ەتۋ ماڭىزدى بولىپ وتىرعانىن ايتتى.

«كەشە مەملەكەتتىك كوميسسيا بۇل تۇرعىدا ناقتى شەشىم قابىلدادى. ەڭ الدىمەن قانداي دا ءبىر قاپەرگە الىنباعان جايتتار ورىن الماۋى ءۇشىن ماسكا شىعاراتىن بارلىق مەديتسينالىق زاۋىتتار باقىلاۋعا الىنادى. بۇعان قوسا، بۇكىل لوگيستيكانى باقىلايمىز. ەگەر بۇعان دەيىن مەملەكەت اۋرۋحانالار ءۇشىن عانا ماسكالاردى ساتىپ الۋعا جاۋاپ بەرسە، ەندىگى ۋاقىتتا بەلگىلى ءبىر ءدارىحانالارعا جەتكىزىلۋىن قاداعالايمىز. كوميسسيا شەشىمىنە سايكەس، ماسكالار بەلگىلى ءبىر باعامەن ءدارىحانالارعا جەتكىزىلەدى»، - دەدى ول.

اۆتور: مارلان جيەمباي