ەلوردادا كوروناۆيرۋس جۇقتىرعاندارمەن بايلانىستا بولعانداردىڭ ءبارى تابىلدى - اكىم

بۇل تۋرالى نۇر- سۇلتان قالاسىنىڭ اكىمى التاي كولگىنوۆ ايتتى، دەپ حابارلايدى قازاقپارات ءتىلشىسى.

«مەملەكەت باسشىسى قاسىم- جومارت توقايەۆتىڭ جارلىعىنا سايكەس، توتەنشە جاعداي ەنگىزىلگەنى بەلگىلى. كوروناۆيرۋس ىندەتىنىڭ وتە جىلدام تارالۋىنا بايلانىستى الەمنىڭ بىرنشە ەلىندە توتەنشە جاعداي جاريالانعانىن بىلەسىزدەر. مۇنداي قىسىلتاياڭ كەزەڭدە نۇر- سۇلتان قالاسىندا نىساندار قالاي جۇمىس ىستەيتىندىگى تۋرالى ايتىپ بەرۋگە رۇقسات ەتىڭىزدەر. بۇگىنگى تاڭدا قالادا كوروناۆيرۋسپەن اۋىرعاندار سانى 17 ادامعا جەتتى. سول سەبەپتەن ءبىز قاۋىپسىزدىك شارالاردى كۇشەيتتىك. بۇل ازاماتتارمەن قارىم- قاتىناستا بولعانداردىڭ بارلىعى تابىلدى. ولار ارنايى ورىندارعا جاتقىزىلدى. سونىمەن قاتار زەرتحانالىق زەرتتەۋلەر جۇرگىزىلۋدە»، - دەدى قالا باسشىسى.

ەلوردا اكىمىنىڭ اتاپ وتۋىنشە، 28 - قاڭتار مەن 16- ناۋرىز ارالىعىندا ستاتسيوناردا 752 ادام جاتتى. قازىر ول جەرلەردە 318 پاتسيەنت كارانتيندە جاتىر.

«دياگونستيكا جاساپ، ەمدەۋ ءۇشىن 1051 ورىنعا ارنالعان ارنايى مەديتسينالىق ورىن بەلگىلەندى. قاجەت بولعان جاعدايدا قوسىمشا وسىنشا ورىن دايىندايمىز. مەديتسينالىق قىزمەتكەرلەر كوروناۆيرۋس ينفەكسياسىن جۇقتىردى دەگەن كۇدىگى بار پاتسيەنتتەرمەن جۇمىس ىستەۋدىڭ ناقتى ءىس- ارەكەت ءتارتىبىن جاقسى بىلەدى. ولارعا قازىرگى تاڭدا ولارعا ۇلكەن سالماق تۇسۋدە. سوندىقتان، قالا تۇرعىندارى مەن قوناقتارىن مەديتسينالىق قىزمەتكەرلەردى قولداۋعا شاقىرامىن. مەديتسينالىق ۇيىمدار ءدارى- دارمەكپەن، باسقا دا قاجەتتى زاتتارمەن تولىقتاي قامتاماسىز ەتىلگەن»، - دەدى التاي كولگىنوۆ.

اۆتور: مارلان جيەمباي